Mapapati a nangpalpaltog iti Sudipen mayor iti LU, naaresto

Headlines

CAMP BGEN OSCAR M. FLORENDO, LA UNION – Nakemmeg ti maysa kadagiti suspek iti pannakapapatay ti mayor ti Sudipen, La Union.

Daytoy ket babaen ti naipatungpal a search warrant ti panaglabsing iti Republic Act (RA) 10591 wenno Comprehensive Firearms and Ammunition Regulation Act idi Oktubre 9 ti agsapa.

Maibasar iti report, impatungpal dagiti pulis ti La Union Police Provincial Office (LUPPO) ti nasao a mandamiento
de rekisa nga addaan petsa nga Oktubre 8, 2018 ken inruar ni Judge Jaime L. Dojillo Jr. ti RTC Branch 57, San Carlos City, Pangasinan kontra kenni Rosendo Obedoza Sibayan, 29 anyos, addaan asawa ken residente ti Brgy. Butubut Norte, Balaoan, La Union.

Nakumpiskar iti nasao nga operasion ti innem a live ammunition ken maysa a fired cartridge ti cal. 5.56 mm (M16).

Kinumpirmar ti Special Investigation Task Group (SITG), nabukel tapno maimbestigaran ti pannakapapatay ti mayor ti Sudipen, a ni Sibayan ket maysa kadagiti lima nga suspek iti pannakapapatay ni Mayor Alexander Buquing idi Oktubre 1, 2018.

Inbunannag pay ti SITG a ti suspek ket naidarum iti kaso a frustrated murder ken murder iti napalabas, ngem agpada a dinismis ti korte. Nakasuan pay daytoy ti homicide idi 2009 ken nasentensiaan babaen ti probation.

Ni Sibayan ket mapapati nga adda pakainaganna iti OMO Gun-for-Hire Group a kangrunaan nga agpatpataray
iti operasion ti gun-for-hire ken gun-running iti probinsia ti la Union.

Kinuna ni PSSupt. Ricardo G. Layug Jr., provincial director ti LUPPO, nga ar-aramiden ti SITG ti kabaelanda tapno
makemmeg ti uppat pay nga suspek iti panakapapatay ti mayor. “The Police Regional Office 1 is exerting all its efforts to arrest all the suspects and give justice to the families of the victims. At the same time, all personnel are on alert especially so that we are on the onset of election period,” kuna ni PSSupt. Herminio S. Tadeo Jr., officer-in-charge ti Police Regional Office 1 (PRO1).

Kiniddawna iti publiko nga ireportda ti aniaman nga impormasion a makatulong iti imbestigasion ken pannakakemmeg dagiti suspek iti pannakapapatay ni Mayor Buquing.

Kaso nga two counts of murder ken panaglabsing iti RA10591 ti inpila ti Balaoan Police Station kontra kenni Sibayan.

Kabayatanna, kayat ti simmukat a Sudipen mayor, Wendy Buquing, nga agipila ti sabali pay a kaso kalpasan a
maitabon ti dati a mayor nga asawana. ABN