March 16, idineklarang special holiday sa LT

March 3, 2018 Provincial

LA TRINIDAD, BENGUET – Idineklara ng Malacañang na special (non working) day ang March 16, 2018 (Biyernes) sa munisipalidad ng La Trinidad, Benguet para sa pagdiriwang ng 37th Strawberry Festival at tampok na Strawberry Festival Parade.
Sa inilabas na proklamasyon ng Malacañang na nilagdaan ni Executive Secretary Salvador Medialdea, sa awtoridad ng Pangulo, noong Pebrero 20 ay idineklara ang naturang araw na special non working day upang mabigyan ng pagkakataon ang mga residente ng La Trinidad na ipagdiwang ang kanilang kapistahan.
Kasama sa suspension ang mga eskwelahan mula elementaria hanggang kolehiyo.
Ayon kay Mayor Romeo Salda hiniling ng munisipalidad ng La Trinidad ang pagkakaroon ng buong pagkakataon ang bayan para ipagdiwang ang taunang Strawberry Festival.
“Gusto namin na lahat ng taga-La Trinidad ay magkaroon ng pagkakataon na i-celebrate itong ating Strawberry Festival at para mas masaya ang ating celebration and mostly ng mga participants din, eh galing sa mga schools din dito sa La Trinidad. Kaya okay din na mag-cancel ng classes on that day para ma-maximize yung ating participation.”
Dagdag pa niya na naihanda na ang lahat para sa festival at hinikayat din niya ang mga turistang makilahok sa pagdiriwang ng Strawberry Festival.
Ayon naman sa isang opisyal ng La Trinidad Municipal Hall nasa mga eskwelahan na kung magsususpinde sila ng klase sa March 17 (Sabado) bilang bahagi pa rin ng isang buwan na Strawberry Festival. ALLAN LEMUEL C. SUNGA, UB Intern / ABN