Martial Law, Marcos/Duterte?

Kamakailan lang ay muling ginunita ang ika-45 anibersaryo ng Martial Law (1081) ni late Pres. Ferdinand Marcos. At gaya ng taunang kaganapan, muling nabuhay ang mga lansangan at mga parke sa pamamagitan ng mga protesta o rallies. Buong bansa ang naghayag ng saloobin hinggil sa mga naganap sa kung ilang taong namayagpag ang batas-militar ni Makoy. At gaya ng taunang eksena, lalong umiinit ang mga upak ng mga naging biktima at saksi sa panahong yun. Sa halip na humupa ang hinanakit, lalo pa yatang sumidhi. Bakit? Dahil hindi basta mabubura ang pilat na yun lalo pa’t ang mithing hustisya ay hindi pa kamit. Uriratin.

******
Sa mga hindi nasaksihan ang pangyayari sa panahon ng Martial Rule, marahil ay hindi gaanong mabigat ang sipa’t katuturan nito sa kasalukuyang panahon. Ngunit para sa mga nakaranas, parang kulog at kidlat ang dagundong nito lalo sa mga biktima ng pagmamalabis at pagyurak sa karapatang pantao. Yan ang dahilan kung bakit laging may sumisigaw at nanggagalaiting makamit ang inaasam na hustisya kahit na sa lisyang paraan. Isang di mabuburang batik ang katotohanang sa nakalipas na apatnapu’t limang taon, umiiyak pa rin sa kadiliman ang kaluluwa ng mga pinaslang, nangawala, pinagsamantalahan at nadungisan ang karapatan sa lipunang ito. Yan ang tunay na dahilan kung bakit sa tuwing sumasapit ang Setyembre 21, nabubuhay ang walang kamatayang hinagpis at hinanakit laban  sa pang-aapi at pagyurak sa kanilang karapatan.

******
Sa panahong deklarado ang 1081 (ni Marcos) ipiniit ang mga kontra; nagsara ang mga himpilan ng radio,  telebisyon at pahayagan. Sabi ng ilan, marami din ang naitulong ng batas-militar sa isyu ng katahimikan, seguridad, disiplina at tatag. Ngunit hindi rin maitatatwa ang pagmamalabis lalo na sa panig ng mga otoridad. Totoong hindi natutulog ang karma. Ngunit ayon sa mga biktima, hindi pa rin sapat upang makamit ang mithing hustisya. Ang masaklap, daplis ng ilan: ang mga Marcos (daw) ay nakabalik muli sa poder gamit ang pulitika. Kahit pa sabihing umuusad (daw) ang mga kasong kontra sa naturang pamilya, naroon (daw) ang takot na magsawala na lang na parang bula ang mga ito sa hinaharap. May upak nga: sa tinagal-tagal ng panahon, bakit (daw) hanggang ngayon ay wala pang napaparusahan? Idagdag pa ang bagong kontrobersiya kamakailan na gusto raw (ayon kay Digong) ng mga Marcos na umalalay sa estado-pinansiyal ng Pilipinas sa pamamagitan ng pagsasauli ng ilang bahagi ng yaman nila. Sa kasalukuyan, medyo tumahimik ang naturang isyu. Natabunan ng mga isyu din sa Martial Law sa Mindanao at mga pangyayari sa Marawi na dinagdagan pa ng tensiyon sa pagitan nina Digong at Trillanes at mga impeachment sa kongreso.

******
Tanong: may pagkakaiba ba ang Martial Law nina Marcos at Duterte? May mga pasaring na: mas grabe raw ang deklarasyon ng batas militar ni Pres. Duterte dahil grabe ang patayan. Sa maikling panahon lang, mahigit sa 668 ang patay sa kalaban ng gobyerno sa Marawi; 150 ang casualties sa panig ng gobyerno at 47 ang sibilyan. Tudo-kabig daw si Digong sa mga otoridad (kahit) pa sa mga kinalawang ang utak. Sabagay, kamakailan lang nag-iba naman ang tuno ni Digong at may banat na siya sa mga bugok na otoridad. At pangkalahatan, ayon sa nakararami: parehas lang ang estilo ng Martial Law nina Marcos at Duterte. Idalangin na lang natin na huwag magdeklara ng Martial Law sa buong Pilipinas, kung hindi magkakaroon ng Part 2 ang 1081 ni Makoy. Lalong darami ang magiging biktima. Adios mi amor, ciao, mabalos!

Amianan Balita Ngayon