Mayor muling nagbabala ukol sa Hypebeast group

March 3, 2018 Metro BLISTT

Muling nanawagan si Mayor Mauricio Domogan sa mga paaralan at mga magulang na subaybayan ang mga aktibidad ng mga kabataan at siguruhin na nakikibahagi ang mga ito sa kapaki-pakinabang na gawain upang makaiwas sa gulo tulad na lamang sa mga “hypebeast” na isa ngayon sa suliranin ng mga kabataan sa lungsod.
Inatasan ni Domogan ang Baguio City Police Office, mga paaralan, mga magulang, mga barangay at ang city social welfare development office na magtulungan upang wakasan ang marahas na insidente na kinasasangkutan ng mga kabataan, kung saan ilan sa mga iniulat na kasangkot ay ang tinaguriang hypebeast group.
Ayon kay Domogan, ipatatawag ang mga magulang ng miyembro ng hypebeast at siya mismo ang personal na makikipagkita at makipag-usap sa kanila.
Dagdag pa nito na ang problema ay karaniwang nag-uugat sa mga tatak ng damit na nilaan ng grupo para sa kanilang sarili na kapag nakikita nila ang iba pang mga kabataan na hindi miyembro ng kanilang grupo na may suot na branded na damit, pantalon, jackets, o sapatos na hindi binili mula sa kanilang mga lider, sila ay binu-bully at kapag lumaban ang mga kabataan na ito, doon nagkakaroon ng gulo.
Dahil hindi maaring kasuhan ang mga menor de edad na miyembro ng hypebeast, ang mga ito ay sasailalim lamang sa pag-profile at pagpapayo sa kanilang mga magulang sa pamamagitan ng City Social Welfare and Development.
Ayon kay Federico Martin, assistant superintendent ng Baguio Schools Division, sisiguraduhin nilang ang mga paaralan ay gumagawa ng paraan upang ipaalam sa mga magulang at estudyante na umiwas sa problemang dulot ng hypebeast group at para na rin masubaybayan at mapayuhan ang mga nasasangkot dito. MA. KRYSTAL I. DIOQUINO, UB Intern / ABN