Mayor, tutol sa extension ng curfew sa mga inuman

March 2, 2018 Latest News

LUNGSOD NG BAGUIO – Tinanggihan ni Mayor Mauricio Domogan ang amendment resolution para mapalawig hanggang 3am ang operasyon ng mga bars sa lungsod.
Pahayag ng alkade, ang mga entertainment establishment o bars sa lungsod ay hindi puwedeng mag-operate ng lagpas sa alas-dos ng umaga ngayong Panagbenga.
Ani Domogan, hindi naman ang inuman ang ipinunta ng mga turista, kundi ang mga tourists spots at Panagbenga Festival sa lungsod.
Naisip niya rin na mas ikabubuti ito ng mga mamamayan dahil marami na ang mga inireport na gulo sa Baguio police. Ilan sa mga gulong ito, umaabot pa sa pisikal na pananakit ng mga taong sangkot.
Dagdag pa ng alkalde na ang kanyang pagtutol ay dahil sa ayaw nitong isipin ng mga turista na ang Baguio ay isang lungsod ng inuman.
Ang mga lalabag sa curfew ng bars at night establishments ay magmumulta ng P1,000 para sa unang paglabag; P2,000 sa ikalawa; P4,000 o pagkakulong o community service sa ikatlo; at P5,000 para sa ika-apat na pagkakataon at ang pagpapasara ng establisimiyento.
Sang-ayon naman ang ilang mga residente sa naging desisyon ni Mayor Domogan.
“Okay naman na 2am magsara yung mga inuman, actually late na nga yun e. Siyempre mahirap na, mamaya may lasing tapos manggugulo lang lalo na madaming tao sa Session in Bloom,” sabi ni Paulyn Geslani, isang residente.
Ayon naman kay Ruth Bautista, “Okay sa akin yung ganung oras para iwas gulo na sa kalsada. Kawawa naman kasi yung mga inosenteng nadadamay sa gulo.”
Isa ito sa mga hakbang ng lokal na pamahalaan ng Baguio at city police upang mapanatili ang kapayapaan ng lugar sa kasagsagan ng Panagbenga Festival.
Inaasahan na bababa ang incident reports ng mga gulo sa kalsada ng madaling araw upang mas maging kampante sa pamamasyal ang mga residente at mga turista sa Baguio lalo na ngayong bukas ang Market Encounter sa Lake Drive sa Burnham Park at Session in Bloom naman sa Session Road na pawang bahagi sa pagdiriwang ng Panagbenga. RC BJON C. CATACUTAN, UB Intern