Mga operator ng drop ball, puntirya ang mga lamay

March 2, 2018 Latest News

LUNGSOD NG BAGUIO – Modus ngayon ng mga operator ng iligal na sugal na drop ball ang pangongontrata sa pamilya ng mga namatayan. Kapalit umano ng pagpayag ng pamilya sa paglalagay ng drop ball ay magbibigay ang operators ng malaking halaga sa pamilya ng namatayan.
Isa sa mga operasyon ng drop ball sa lamay ay namataan sa Slaughter Compound, Baguio City. Mismong si Baguio City Mayor Mauricio Domogan ang pumunta sa lugar at nagpatigil sa ilegal na sugal.
Sinabi pa ni Domogan, “Apo Kapitan, baka may libing dito eh baka meron na naman susunod dito. Parang itutuloy niyo yung sugal. Hindi dapat!”
“Mayroon tayong ordinansa diyan,” idinagdag pa ni Domogan.
Ang tinutukoy na ordinansa ay ang Code of Practice for Responsible Gambling na isang regulatory ordinance na naglalayong mapatawan ng karampatang parusa ang mga sangkot sa ilegal na sugal at ang pagkakaroon ng fixed term special permits para sa mga balak magpatayo ng mga pasugalan.
Ang mga gustong magpatayo ng Electronic Casinos (E-Casinos), E-bingo, cockfights, online sports betting at iba pang klase ng online na pasugalan sa lungsod ng Baguio ay oobligahin nang kumuha ng fixed term special permits.
Nilalayon ng ordinansa na magkaroon ng mas detalyado at mas striktong panukala sa proseso ng pag-aaply upang mabago ang isip ng mga nais magpatayo ng pasugalan sa lungsod.
Ang mga mahuhuling lalabag sa ordinansa ay magmumulta ng P5,000 sa unang pagkakataon, 30 araw naman na suspension ng operasyon ang ipapataw sa pangalawang paglabag, at ang pagkansela sa fixed term special permit ang ipapataw sa ikatlong paglabag.
Samantala, mismong si Philippine National Police Chief Director Ronald “Bato” Dela Rosa ay nagdeklara ng war against illegal gambling.
Ang mga pulis sa iba’t ibang rehiyon sa bansa ay nagsasagawa ng “one-time-big-time” na mga operasyon upang matawag na illegal gambling free ang kani-kanilang mga lugar. RC BJON C. CATACUTAN, UB Intern