MGA PROBLEMA NOON… KINALKAL NA!!!

September 17, 2022 Opinion

Deka-dekada na ang dumaang panahon…ngunit di pa huli upang kalkalin ang mga dating problema para
maisaayos o masolusyonan sa kasalukuyan. Reaksiyon ng marami: mabuti naman upang malaman ang katotohanan. Upak ng iba: kung di nakabalik ang mga Marcos sa Malakanyang, may kalkalan kaya? Sige, relaks muna at alisin ang pagpapanting o panggagalaiti para masarap namnamin ang simoy ng Pasko
na higit isang daang araw na lamang ay darating na.

Narito ang ilan sa mga dating problemang nahalukay: Mga magsasakang pinautang noon at nabaon na sa
alanganing pagbabayad….binigyan ng isang taong pagkakataon upang di muna mamroblema sa
singilan. Ayon sa Marcos administration…makakabayad din sila. Bigyan lang ng tamang templa upang tuloy ang pagsasaka at magkaroon ng produksiyon. Yong nabuking na taguan ng asukal,
nabigwasan na. Maraming bodega ang may imbak…naiimbestigahan na.

Katunayan, may utos na si Pres. Bongbong Marcos na lahat ng ani hanggang Agosto 2023 dapat para sa atin muna at di dapat magluwas. May utos din siyang maaring mag-import hanggang 150,000 metric tons
lang bagama’t sabi ng mga analysts ay pag-aralang maigi kung ilan dapat ang aangkatin. Sa problema ng
galunggong…puwede raw mag-angkat base sa pagaaral sa kakulangan nito sa bansa. Ang pang-sardinas na tamban ay bastante naman daw gaya ng nangyaring pagdagsa nito sa isang bayan sa Iloilo.

Sa sibuyas naman…hintayin lang ang tag-ani, ika ng Palasyo bago umaksiyon sa likud ng isinasagawang imbentaryo sa biglaang pagkawala ng puting sibuyas. Tiis muna sa pula. Yung napaulat na baka kapusin tayo ng bawang….naroon sa Itbayat, Batanes ang solusyon. Ang nakalkal na problema ng mga magsasaka dahil sa dagsa ng imported na produkto….nakakastigo na ang mga importers hinggil dito. Ilan lang ang mga ito ang natutukan matapos nakalkal at naipabatid sa bayan na ang mga problemang ito ay noon pa nangyayari at ngayon na ginagawan ng solusyon.

Kabi-kabila naman ang mga isyung iniimbistigahan ngayon ng kongreso (House/ Senate). Umupak kamakailan si Senador Bato De la Rosa na “kulang” daw sa “asim” ang ginagawa ngayon ng PNP. Sagot naman ni PNP Chief Gen. Azurin: may kanya-kanya silang pamamaraan upang bakahin ang kriminalidad kaya bigyan sila ng pagkakataon. Nakalkal din ang malaking budget daw na hiling ng Edukasyon. Sagot naman ni VP Sara Duterte at sekretaryo ng Dep-Ed: makatarungan lamang dahil sa dami ng mga pangangailangan sa konstruksyon at kauring programa para sa edukasyon.

Sa isyu ng overprice daw na laptop….may mga ulo ng gumulong hinggil dito at di pa tapos ang imbestigasyon. Nakalkal na rin ang isyu ng serbisyo sa transportasyon kung saan, nagtuturuan na ang
mga concerned agency at IT provider hinggil dito lalo na sa diumano ay kakuparan lalo na sa plaka, rehistrasyon at pagkuha ng lisensiya sa pagmamaneho. Ilan lang yan sa mga isinalang sa imbestigasyon.

Heto ngayon ang pinakahigante sa lahat ng kasalukuyang kontrobersiya. Humihiling na ang Pangulong Bongbong Marcos na muling bukasan ang isyu ng “estate tax” ng pamilya-Marcos. Ayon sa mga analysts – tapos na raw ang isyu. Pero sabi ng mga Marcos dapat busisihin ito dahil wala sila sa ating bansa
nang tinapos ang naturang usapin. May karapatan daw sila na madinig naman ang kanilang panig. Sa panig ng mga praktikal na sumusunod sa isyu: may karapatan ang mga Marcos na alamin ang katotohanan at anong ginawa at saan napunta ang mga sakup ng “estate tax”na mga ari-arian.

Dekada ang dumaan na may busal ang mga Marcos sa mga kontrobersiyang ito. Panahon na siguro, ika ng marami, na mabigyan ng karampatang hustisya ang kontrobersiya. Kung saan patungo ang mga kinakalkal na problema noon…malalaman na ng sambayanan ang katotohanan ngayon. Adios mi amor, ciao, mabalos.