Minahan sa Benguet inatake, 1 sugatan sa ligaw na bala

LUNGSOD NG BAGUIO – Hinihinalang kagagawan ng mga rebeldeng miyembro ng New Peoples Army at Jennifer Carino Command ang pagpapasabog at pag-atake sa ilang pag-aari ng Lepanto Consolidated Mining Company noong hating gabi ng Huwebes (June 8, 2017).

Sa isang panayam kay Mankayan Mayor Materno Luspian, “Ikinagulat ng mga residente nang makarinig ng putukan sa bayan ng Mankayan noong past 12 ng hating gabi (Huwebes) sa dalawang barangay ng Tabuk at barangay Colalo. Nanawagan ako sa ilang mga residente na huwag lumabas dahil magkakasunod ang putukan at pati pagsabog.”

Sinabi ng mayor na nagpatawag ito ng kapulisan upang rumesponde at nalaman na nanggagaling ang pagsabog sa Lepanto Mines. “Bandang alas tres ng madaling araw, tumawag sa akin at kinumpirma na may mga pinasabog na pag-aari ng Lepanto, isang bulldozer, pinasabog rin ang generator at backhoe at ang Compaq ng PNP,” aniya.

“Napag-alaman na dalawang grupo ang may gawa nito, ayon sa pagsusuri ng mga rumesponde na pulis, bale tatlong bomba ang pinasabog ng mga rebelde at isang dinamita naman ang hindi sumabog,” saad ni Luspian.

“Naapektuhan ang tailings dam ng Lepanto na posibleng mass destruction ang plano nilang gawin dahil kapag nangyari na nagkaroon ng leak ito at masira ay masama ang mangyayari from Cervantes, Qurino hanggang Abra, na huwag naman sana mangyari ito,” aniya.

Nakiusap ang mayor sa mga hindi pa nakikilalang mga armadong umatake sa minahan na kaysa manira ng ari-arian at manakit ng mamamayan ay makipag-usap na lamang ang mga ito. “Ang apela ko lang sa mga gumawa ng marahas na pagpasabog at sumira ng mga pag-aari ng Lepanto kung may galit man kayo sa kompanya o reklamo sa gobyerno ay sana humarap kayo sa akin, bukas ang aking opisina at mag-usap tayo, huwag niyo idamay ang mga sibilyan, gusto natin ng mapayapang lugar para sa pag-unlad ng ating bayan ng Mankayan,” ani Luspian.

Samantala, isang construction worker naman ang naiulat na tinamaan ng ligaw na bala sa hita nito. Agad naman itong dinala sa ospital.

Patuloy pa rin ang pagsisiyasat ng Police Regional Office-Cordillera (PRO-COR) sa pinangyarihan ng insidente. ABN

Amianan Balita Ngayon