Naguilian transport terminal ken town center, aprubado ti LU development council

SIUDAD TI SAN FERNANDO, LA UNION – Inaprobaran ti La Union Provincial Development Council (PDC) nga idadaloan ni Chairman Gov. Francisco Emmanuel “Pacoy” R. Ortega III ti singasing a pannakaipatakder ti transport terminal ken town center iti ili ti Naguilian kabayatan ti taripnong dagitoy idi Enero 26, 2018 iti Provincial Capitol ditoy siudad.
Ti nakuna a proyekto ket mayendorso iti Regional Development Council (RDC) para iti technical assistance tapno mailatangan ti pondo.
Singasing a proyekto daytoy ni Naguilian Mayor Reynaldo J. Flores a mangted kadagiti serbisio a kasapulan dagiti umili ti munisipio.
Maipatakder ti transport terminal ken town center iti 3.334 ektaria a daga a kaarpad ti Naguilian-Baguio Road iti Barangay Ortiz, Naguilian, La Union.
Kinuna ni Mayor Flores a ti proyekto ket manamnama nga agserbi a pangrugian ti sustinable nga social-economic development ti Naguilian ken dagiti kabangibang nga il-ili ti Bauang, Burgos ken Bagulin.
Innayonna a babaen ti nakuna a proyekto, maawis dagiti investor ken stakeholders a mangipatakder kadagiti mall ken dadduma pay nga establisimiento iti ili a mangparnuay iti nagduduma a trabaho ken pagbiagan.
Maipatakder dagiti hotel ken sabali pay a pagdagusan dagiti biahero kabayatan ti panagbisitada iti Nagulian, kinuna na.
Plano ti lokal a gobierno ti Naguilian a mangipatakder ti nagduduma nga opisina iti kabarbaro a town center a pakairamanan ti Bureau of Fire (BOF), Land Transportation Office (LTO), Department of the Interior and Local Government (DILG) ken Rural Health Unit.
Iti baet dagiti nakuna a proyekto, sinigurado ni Mayor Flores a matarimaan dagiti kalsada ken drainage systems ken mataginayon ti kappia ken masalakniban dagiti umili babaen ti pannakitinnulong dagiti nagduduma nga ahensia a nakalinya iti direktiba ti probinsial a gobierno nga aramiden ti La Union kas “Heart of Agri-Tourism in Northern Luzon by 2025”.
Ti singasing a pannakaipatakder ti Naguilian Mini-Hydro Power Plant ket inaprobaran met ti council ken kadwa a mayendorso iti RDC. PITO LU / ABN

Amianan Balita Ngayon