Nakapili kan iti botosam, Kayong?

May 11, 2019 Opinion Sirmata ken Tagtagainep ni Mang Gusting

Naimbag nga agsapa,aldaw,malem wenno rabii kadakayo amin kabaranggayan, kakayong, gagayyem ken saan nga am-ammo.

Sumangbay manen kadagiti nadayaw a matmata yo toy kolum tayo ket sapay la koma ta naikkatendagiti sangkap kadagiti mulagat yo.

Kumusta kayo metten Kakayong? Dua nga aldaw sakbay ti Mayo 13 a kaaldawan ti panagbobotos, Kayong Angkuan. Ania, kinaradap dakan este, nakapilikan iti ibotos mo ti kayat ko a sawen.

No kaano nga aldaw wenno oras laengen ti palabsen, panagbobotosen, isu met a maringgoran pay laeng dagiti kandidato.

Uray ania a panagkaradap ti aramidenyo, nalpasen a nakapili dagiti botante iti botosan da. No kunaen yo a mabaliwan pay ti panunot dagiti botante nga uray inkay ikaradap nga ipaarikap kadakuada ti tallo’t taona wenno sumagmamanu a nakapannimid, awanen.

Nupay awaten da, kasta lattan. No ania ti napili dan nga ibotos, isu daytan. Saanen a mabaliwan pay no para kaniak, a ta majority kadagiti botante itan ket wais. saan kadi a husto ti imbagak, Kayong Angkuan?

Nasiriben dagiti kailian tayo. Alaen da nga agpayso ti iyawat mo ngem dina kayat a sawen a siento porsiento a sikan ti ibotos da.

Dagitay kuna da nga agkaradao, dagitay ammo da a di mangibotos kadakuada ti karadapen da tapno manamnama nga ibotos dan tay nangikaradap ken nangipapetpet a kunada.

Ti ketdi makitkita tayo a parikut ita ket isu ti possible a panagblack-out na ket dita met a gundawayan da ti mangagaw kadagiti urna wenno ballot boxes wenno saan tay ibagbagada a ballot box switching.

Kasanu kunam, kailian, kakakayong ken kabaranggayan, masukatan dagitay orihinal nga urna iti sabali ket daita, tay kayat da a kandidato ti nakasuraten kadagiti balota ngem adda ngata pay napasamak a kasta kadagii napalabas nga election?

Ti ketdi kunada, nakaprogramen idiay counting machine ti kayat da a paruaren! Nagadu nga akusasyon tunggal kandidato a naabak.

Ti ketdi paliiw tayo, awan sa ti naabak a kandidato ngem ketdi, nasaur kanu wenno biktima ti dagdag bawas. Ania la ketdin nga agpayso ti taray ti pulitika ditoy pagilian tayo. Onli in da pilipins a kunada.

Koma kailian, kayong Angkuan, natalna, naurnos ken peaceful a kunada ti election inton Mayo 13 tapno awan ti maipatli a biag gapu laeng iti kalikagum ti maysa a kandidato nga isu ti mangabak ket aramiden na amin a pamuspusan nga uray pumatay payen no kasapulan.

Ala, kayong adda pay dua a rabii manipud ita a sursuraten tayo daytoy a kolum tayo tapno agpanunot ka a nasayaat no asino a talaga ti inka botosan.

Tay kunada, adalen a naimbag ti kinatao na, kalidad na ken pamilia a nagtaudan na. Kangrunaan ti amin, ammo na ti agbuteng iti Dios.

Ala, sapay la koma ta saan tayo manen nga agbiddut kadagiti intay pilien a lider tayo.

Iti met biang dagiti kakabsat a kandidato, sport koma laeng. Awaten a sipupuso ti pannakaabak tayo. Saan koma a dayta ti panggapuan tayo nga agsakit ti nakem na ket no ania man la ditan ti intay aramiden a kalokuan.

Good luck kadakayo amin.Ala, Kakayong, kasta pay ta naimasan tayo manen. Babayoooo, tsuptsup, muahmuahh.