NALAKA A TAGILAKO TI DA-KADIWA NG PANGULO, TAGIRAGSAKEN DAGITI ILOKANO

July 21, 2023 Headlines

LAOAG CITY, Pangasinan

Tapno ad-adda a makaala iti nalaka a magatang a produkto ti agrukultura ken panagkalap iti Kadiwa ng Pangulo ti Department of Agriculture (DA), maysa a caravan iti naaramid idi Hulio 17 sadiay paraangan ti Provincial Capitol ti Laoag City. Aggigiddan a naangay iti intero a pagilian, panggep iti Kadiwa ng Pangulo a tulongan dagiti mannalon ken mangngalap a mapalawa ken direkta a mailako dagiti produktoda kadagiti gumatang iti nalaklaka a presio.

Iti pannakitinnulong ti Provincial Government of Ilocos Norte, daytoy ket proyekto a panagkakadua iti walo nga ahensia iti gobierno kas iti DA ken dagiti naikapet nga ahensia, Department of the Interior and Local Government (DILG), Department of Labor and Employment (DOLE), Department of Trade and Industry (DTI), Department of Social Welfare and Development (DSWD), National Food Authority (NFA), ken iti Bureau of Fisheries and Aquatic Resources (BFAR).

Agarup 34 a grupo ti mannalon, small and medium enterprises, ken dadduma pay a lokal a negosiante ti nakipaset iti nasao a caravan. Dagiti produkto ti agrifishery manipud bagas, lana,
prutas ken nateng, grocery items, aramid ti ima (handicrafts), ken dadduma pay a tagilako iti maiparang iti paraangan ti Kapitolio. Iti maysa nga interbiu, imbaga ni Daylin Pascual manipud Barangay 56 Bacsil North, Laoag City, nga agyamyaman isuna iti caravan ti Kadiwa ng Pangulo ta
naikkan isuna iti gundaway a mailako dagiti produktona ti agrikultura kas iti tarong, bulong ti parya, ken naluom a saba.

“Maragsakanak ta naikkan kami iti kastoy a gundaway a makalako kami ken maiparangmi kadagiti aggatang dagiti produktomi. Organiko dagitoy produktomi ken nalaka dagiti presio,” kuna ni Pascual. Maragsakan met ni Rachelle Lagmay, maysa a residente ti Laoag City iti nagatang na a produkto iti nalaklaka ti presiona, no idilig kadagiti presio iti kadawyan nga aldaw ti merkado.
“Agyamanak iti Kadiwa ng Pangulo gapu ta adu iti nagatangko a produkto iti nalaklaka a presio.

Sapay koma ta ad-adu pay a Kadiwa kadagiti sumaganad nga aldaw,” kuna ni Lagmay. Kas insalaysay ni Vice Governor Cecilia AranetaMarcos, imbagana kadagiti agindeg ken aggatang a
“tagiragsakenda iti aggatang” ken gundawayanda iti Kadiwa ng Pangulo, a maysa nga inisiatibo a proyekto daydi president Ferdinand E. Marcos Sr. ken sigud a First Lady Imelda R. marcos, ken intuloy ti anakda, Presidente Ferdinand R. Marcos Jr.

(MJTAB PIA Ilocos Norte/PMCJr.-ABN)