Nalpas ti ani, awan garami?

Naimbag nga agsapa, aldaw, malem wenno rabii kadakayo amin kabarangayan, kakayong, gagayyem ken saan nga am-ammo.

Sumangbay manen kadagiti nadayaw a matmata yo toy kolum tayo ket sapay la koma ta naikkaten dagiti sangkap kadagiti mulagat yo. Kumusta kayo metten Kakayong?

Makalwas kalpasan ti botos, adu dagiti manglapayag iti isem na, adda met dagiti saan a maipinta ti rupa na gapu’t leddaang na a naabak dagiti dadduma, saan da a maaklon a naabak da no di ket nasaur da kanu.

Saan a naibilang ti botos da? Adda dagiti bangolan wenno kingpin a kuna da iti pulitika ti nadistugaw wenno inabak dagiti agkabanuag wenno kattapug iti tay-ak ti pulitika.

Adda met dagiti makuna a nagpason ti kinalatak da a nagserserbi iti manu a dekada.

Adda met dagiti makuna a come-backing wenno agsubli kalpasan a naturpos da ti termino da wenno tay kuna da a three terms. Adu latta ti innakusar wenno binnabalaw a naabak nga uray naggatang da iti botos a kuna da.

Dita ti pakakitaam a nakasursuron ni pinoy. Pudno nga inawat na ti inyawat mo a kuarta ngem saan a siguridad daydiay tapno sikan ti botosan na. Ta kuna da, uray ket kuarta tayo met laeng dayta nangruna dagiti re-electionist kanu.

Kinurakut da met laeng kuna dagiti umili. Nupay saan nga amin ket makuna a madi ti leadership na wenno performance na, ti dayawen tayo ket dagiti makuna nga awan nakalaban na a kayatna a sawen, good job.

Ngem adda met latta madillaw da. Mabalin kadi a nabayadan dagiti nagpanggep a mangkalaban kadakuada.

Nalpasen ti election. Koma ket agsubli manen ti panaggagayyem wenno panagkikinaawatan ta adu piman tay kunada a nangisakripisio iti nasayaat a linnangen na iti gayyem na, kaarruba na, asawa wenno kabagian na gapu laeng iti pulitika.

Adda pay agkakabsat a naglalaban iti maymaysa a posision iti maymaysa nga ili. Adda ammoyo? Ti maysa pay a nadlawtayo pada dagiti lugar a no sadino ket agkakabagyan wenno agassawa, agama wenno aglolo kas kada aglola ti nabotosan.

Adu ti kasta kailian, kakayong. Sadino kuna yo dagitoy a lugar? Uray saan min nga ibaga, ammo mi nga ammo yo. Rugian tayon idiay Ilokos Norte nga agpa-abagatan.

Uray saan min a binsa-binsaen ammoyon no asino dagitoy. Adda dagiti agkuna a ti pulitika ket kasla panagmula a no nabagyo, nganga a kunada.

Nalpas ti ani, awan garami. Adda pay agkuna nga perdi bagas, agraman toyo. Wen, kakayong mi ida. Talaga a kasta iti pulitika nangruna no naggastos ka.

Naggatang ka iti botos ngem naabak ka latta. Daytan ti nakas-ang. Makapabagtit a kuna da. Lugi negosio kuna met ni sanglay ta adda pay nagkuna ita a tiempo, saanen a mabalin a diay laeng
kabaelam wenno nasayaat a platapormam ti inka ikarkarit ta masapul a no nagiyawat ka iti pollietos adda kanu metten nakasigpit wenno naka-ipit a nakapannimid wenno tallo’t tao na a papel de bangko.

Ala nalpasen ti election. Kas intay nakuna, lipatenen ti ginnura, ngem ketdi agtitinnulong tayo koman. Ket dagita met napagasatan, sapay la koma ta tungpalen tayo dagiti inkarkari tayo.

Panunoten yo, no dikay tungpalen, agdas-al met la kadakayo ta saan kay ton a makapidua a kunada. Koma, saan tayo nga aramiden a negosio ti pulitika a kuna da a nagpailayon ka tapno bumaknang ka.

Ania a biag ni Juan dela Cruz wenno Mang Angkuan. Ti maudi nga inkam makuna ta adu pay ti intay koma pagsasaritaan ngem iti sumaruno laengen a kolum tayo.

Husto diay kuna ni Senador Many Paquiao nga ti pulitika ket kasla boksing. Adda maabak, adda mangabak. No kasta, no naabak ka, awatem.

No nangabak ka agrag-o ka. Ngem ti maudi a makuna mi, ti kanu saan a panangawat iti pannakaabak ket isu ti pudpudno a kinatakrot! Ala Kakayong, kasta pay ta naimasan tayo manen.

Sirmata ken Tagtagainep ni Mang Gusting

Amianan Balita Ngayon