Napoles, pinawalang-sala! Ginoo!

May 14, 2017 Daplis Walang Mintis Opinion

Maryusep! Si Napoles ang tinaguriang Pork Barrel Queen, pinawalang-sala? Lusot na? Oh, my pork! Plunder ang kaso dahil grabeng limpak na pera ng bayan ang kinamal ng kanyang pekeng NGO na naging sanhi rin kung bakit nakabilanggo ngayon ang tatlong senador at marami pang nakasuhan, lalaya na? Haanooo? Sandali lang pards, relax lang. Hindi sa plunder case siya absuelto, ayon sa Court of Appeals, kundi sa kasong serious illegal detention na isinampa sa kanya ng kanyang kamag-anak na si Benhur Luy. Haayyy  buti na lang.. Kundi nakupo, malaking sigalot  ire, pards. Mantakin mong nabuhay siya sampu ng mga pamilya nang napakarangya na halos di na nila malaman kung saan itago ang kanilang sandamukal na pera mula sa kinutsabang mga mambabatas na may PDAF o Pork barrel. Maliwanag na pera ng bayan ang kinamal. Kaya kung ano man ang pagkakasala ng mga Pork Mambabatas na yun, ganun din ang kasalanan ni Napoles dahil siya ang nanikwat sa pera at magkakasabwat silang nambulsa. Haayyy buti na lamang, nakakulong pa rin siya!

******
Marami kasi ang nagulat nang biglang nabulatlat sa madla kamakailan si Ms. Janet Lim Napoles, na reyna ng P10Billion Pork Barrel Scam. Ang inakala ng marami ay lusot na siya sa kanyang kasong plunder. Saka lang nakahinga ng maluwag nang malamang ang serious illegal detention pala ang inaksiyunan ng  C.A. Na ang ibig sabihin, hindi nakalusot ang isinampang kaso ng kamag-anak niyang Pork Barrel scam whistleblower na si Benhur Luy. In short, hindi pa rin siya (Napoles) makakalaya. Sa loob pa rin siya ng selda dahil may kaso pa siyang plunder. Yun lang at maaari na itong ilipat ng kulungan mula sa BuCor. Ang huling hirit nga ni Janet ay ilipat siya sa kostudiya ng NBI. Habang sinusulat ang espasyong ito, wala pang pinal na desisyon hinggil dito. May bumulong: dapat daw ay ilipat na lang siya sa detention center kung saan naroroon sina Senador Enrile, Estrada, Revilla at de Lima. He he, tiyak malalaking eksena ang magaganap kapag  magkakapit-selda na sila, di ba? Tunay ng giyera yan pag naganap, pards. Giyera ng bunganga.

******
May bagong kontrobersiya: gustong gawing state witness si Napoles! Sus my tsitsaron! Hindi ba’t siya nga ang dahilan kung bakit nademonyo ang maraming mambabatas at ilang mga opisyal ng gobyerno? Yan kasi ang paniniwala ni Justice Sec. Vitaliano Aguirre na magiging credible witness si Napoles upang maituro niya ang lahat ng taong may kinalaman sa PDAF Scam dahil siya ang itinuturong may utak sa kakurakutang naganap. Tiyak na hindi lang ang mga nakakulong na senador ang nakinabang (nang illegal) sa Pork Barrel. Sabi nga ng kanyang abogadong si Atty. Stephen David na puwede itong maging state witness upang malaman ng taumbayan kung sino ang mga sangkot sa Pork Barrel scam. Noon pa raw gustong maging state witness si Napoles, ayon kay Atty. David, ngunit hindi pinayagan ng dating administrtasyon. Hmmm, parang may naaamoy tayo pards. Baka maraming kapanalig ng Aquino administration ang ibubulgar ni Janet na may kinalaman din sa Pork scam. Di ba ang sabi noon ni dating DOJ Sec. at naging senadorang nakakulong ngayon, na may mga mambabatas pa at mga tao pang nasa batch 2 (baka may batch 3 pa)? Bakit hindi inilabas? He he, tiyak lalabas na ang mga yan kapag nag-witness ang Pork Queen! Abangan ang susunod na giyera – pabahuan ng kartada ng mga nagpayaman sa Pork! Tuhugin!!! Adios mi amor, ciao, mabalos!