NFA-Ilocos Norte nag-umpisang bumili ng palay sa P20.40

February 4, 2019 Provincial

LUNGSOD NG LAOAG – Ipinahayag ng National Food Authority (NFA) sa probinsiya ng Ilocos Norte na inumpisahan na nilang bumili ng palay mula mga lokal na magsasaka rito sa P20.40 hanggang P21 kada kilo.
Ipinagbigay-alam ni NFA-Ilocos Norte Provincial Manager Eleanor A. Andres sa mga magsasaka na magbibigay ang gobyerno ng mga insentibo sa mga indibiduwal o grupo ng mga magsasaka na magbebenta ng kanilang ani sa NFA.
Sa ilalim ng new procurement initiative ay magbibigay ang NFA ng karagdagang P3 kada kilo buffer stocking incentive (BSI) maliban sa iba pang umiiral na insentibo na karagdagang P0.70 at government support price na P17 bawat kilo.
Ang 70 sentimos kada kilo na insentibong ibinibigay sa mga magsasaka na binubuo ng isang 20 sentimong drying incentive, 20 hanggang 50 sentimo na delivery incentive depende sa distansiyang kilometro kung saan nagmumula ang palay at 30 sentimo cooperative development incentive fee para sa mga asosasyon na kinabibilangan nila.
“We are encouraging our farmers to sell their produce and avail of the NFA’s new procurement program for palay, which was launched in response to the clamor of farmers to increase the P17 per kg. buying price which was implemented for the past 10 years,” ani Andres.
Sa Ilocos Norte, ang NFA buying station ay nasa Barangay 2, Sta. Joaquina, Laoag City.
Sa ngayon ay ilang magsasaka ang nag-umpisa nang mag-ani ng palay subalit mas pinipili nilang ibenta ito sa mga pribadong rice traders na binibili ito sa mas mataas na presyo.
Ang NFA na ahensiyang nakakabit sa Opisina ng Presidente ay may mandatong siguruhin ang seguridad ng pagkain ng bansa at patatagin ang suplay at presyo ng pangunahing pagkain na bigas kapuwa sa panig ng sakahan at consumer.
Bumibili ang NFA ng palay sa mga magsasaka hindi para lamang patatagin ang presyo sa farm-gate kundi pahusayin pa ang stockpile nito.
LAdriano,PNA/PMCJ/ABN