Ngilinen Kakayong!

Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy  kulom tayo. Kumusta, mag-an kayo amin nga awan labasna.

Ngem sakbayna, kakayong, adtoy man pay ti ababa nga inkam pangray-aw kadakayo tapno makerrasan ti dudukot tayo a kunada. Nagtagtagainep ni Mang Gusting ket kampay idi, nagsarakda manen ken kumparena a Jun. Kastoy ti eksena…

Gusting: O, pare Jun, bilibak kenka, a. Ita man pay a nagsuotka it relo, gold plated pay ken sus ina, nagpintasen. Nangina dayta a.

Jun: [rungiit] Umapalkansa met pare Gusting.

Gusting: Medio, talaga ngamin a napintas.

Jun: Inabakko daytoy iti tinnarayan, pare.

Gusting: Aya, asino dagiti kinalumbam?

Jun: Tallo kami, pare Gusting.

Gusting: Tallo kayo? Inabakmo ida?

Jun: Wen pare, anian aya, awan la’t bilib mo kaniakon.

Gusting: Asinoda ngay pare Jun?

Jun: Maysa a polis, ti akin-kukua ken siak!

Hahahahaah…ania, nakapidot kayo met laeng iti adal wenno leksion, kakayongko ida ken nagrungiit kayo met laeng?

Bueno kakayong, kailian, pakatawa laeng dayta tapno dikay nakamurareg a bigbigat. Nupay kunada a lawas ti ngilen, umisem tayo latta met, ah. Nupay malagipko idi dakami ti agtutubo ken ub-ubbing, tunggal ngilin talaga nga adu ti mangelin a kunada. Makalawas pay laeng sakbay ti Semana Santa wenno ngilin a kunada, masapul a nakasagana amin a kasapulan ti makalawas kas koma iti danum, nasakduan aminen a burnay ken pagseldanan a kunada tapno awanen ti agsaksakdo iti tiempo ti ngilin.

Mapan metten mangayo wenno mangisaganan iti binalsig nangruna iti aw-away ta awan pay a pulos agusar kadagiti LPG, pasig amin a sungrod a binalsig wenno kayo. Ngem ita, gapu iti kinamodernon uray iti nasulinek a kunada agus-usardan ti LPG. Malaksid a sumadoten ti tao, awansa pay ketdin ti makayo ta ditay met agmula ita iti kayo. Malaksid kadagitoy a pammati ken aramid tunggal madanun ti Semana Santa, Kakayong, saanko nga ammo no napadasanyo dagitoy… maiparit ti agsao iti napigsa wenno aglaaw kas kada agkakatawa, addakayo latta iti papag a nakauldag ken dumngeg iti kunada a passion wenno dallot, saanko nga ammo no ania ti awagyo dita lugaryo iti dayta.

Adu kakayongmi ida, Kayong Angkuan, talaga a mangelin dayta a lawas a makuna. Maiparit pay iti agiggem iti natadem ta no masugatka kanu, narigat nga agimbag ta natay kanu ni Jesus. Nagduduma a pammati dagiti Apong tayo ngem dakami, uray ita a panawen, masurot koma dagita tapno intay marikna ti nagpasaran ti Apo iti daydi a panawen a pannakailansana it krus idiay bantay kalbaryo ngem dakkelen ti nagbaliwan ti panawen, Kayong Angkuan, ta imbes nga agngilin wenno ag-fasting a kunada iti English, saan ta kas napaliiw tayo, daytoy a tiempo nangruna kadagiti bumakasion a dadduma nga aggapu iti siudad, mangarkilada iti videoke ket permi daytan a kankanta kas kada inum. Awanen aridenggan a kunada. Sus ina, awanen tay kunada nga anag ti Semana Santa wenno panagngilin, ala ti makunami laeng kakailian, kakayongmi ida, daytoy ket paliiw tayo laeng. Ta uray ti sirmata ken tagtagainep tayo, adayo a kastoy ti pagtungpalan iti masungad nga aldaw ngem bunga seguro ti kinamodernon ti taray ti biag, talaga nga adu ti pagbalbaliwanna.

Ala ngaruden, kasta pay kakayong ta ne, overtime tayo manen ket… ala, kasta pay ket ne, nakaadu tayo manen. Babayoo, tsup tsup muahmuah.