Opisial ti polis a nainaganan iti pannakapapatay iti mayor naisaklang

Headlines

NALAOAN, La Union – Maysa nga opisial ti polis nga nainaganan iti pannakapapatay ni dati a Vice Mayor Al-Fred Concepcion ti Balaoan nga idi napalabas a tawen ket inrupirna nga saan nga nagbasol daytoy iti pannakaisaklangna sadiay Balaoan, La Union idi Oktibre 28,2020.

Ni SPO1 Dario Naval Cahigas ket maysa kadagiti maatap nga panangtambang idi Nobiembre 14, 2018 nga nagresulta iti pannakapapatay ni Al-Fred Concepcion ken maysa kadagiti katulonganna ken pannakadangran iti kakadua ti biktima karaman ti anakna a ni Balaoan Mayor Aleli Concepcion.

Sangsangoen ni Cahigas iti two counts ti murder ken four counts ti attempted murder.

Kadua ni Mayor Aleli Concepcion ti amana idi dagiti armado a lallaki ket pinaputukanda ti luganda bayat agturongda iti munisipio.

Natay da Al-Fred Concepcion ken ti katulonganna a ni Mike Ulep, ni Aleli Concepcion ken tallo pay ket nadangran bayat iti panagatake.

Ni Regional Trial Court Branch 34 acting Presiding Judge Asuncion Fikingas-Mandia ti nangannong iti pannakaisaklang ti suspek idiay Balaoan, La Union. Inrupir ni Cahigas nga awan basolna iti amin a darum nga naipila kontra kenkuana.

Di nagparang ti abogado ni Cahigas ken intignayna iti panangbalbaliw manen iti kaso, ngem binusor ti abogado ti pamilia ti Concepcion iti tignay ken sinupiatna nga maiparit iti sidong ti agtultuloy a pangngeddeng ti panangbista.

Gapuna, imbilin ti korte nga iti akusado ket maipaayan ti tulong manipud iti Public Attorney’s Office.

Nayeskediul iti pre-trial inton Nobiembre 27, 2020. Iti un-unana, kiniddaw ni Mayor Concepcion nga ibutaktak ti suspek iti kinasiasino ti makinnakem ken dadduma a nagkukumplot iti nasao nga krimen.

“I hope and pray that Cahigas divulges what he knows about our ambush and reveals the identity of his co-conspirators for his own peace of mind,” kuna iti Mayora ti umuna a pagsasaona. Sigun ti report ti polis, ni Cahigas nga maysa a miembro ti PNP nga naidestino iti Regional Police Holding Assistance Service of Police Regional Office 1, ket sitatallugod a simmuko idi Agosto 18, 2020 bayat iti panangiwayat ti mandamiento de aresto nga imparuar ni Balaoan Regional Trial Court Branch 34 Presiding Judge Marita Bernales Balloguing.

Mau Victa/ABN