P112.2-M GATAD TI SHABU INSUKO ITI MAYSA A MANGNGALAP IDIAY PANGASINAN

August 24, 2024 Headlines

MALASIQUI , Pangasinan

Kinompirma dagiti autoridad idi Mierkoles nga iti pulbo iti uneg ti plastik a pagkargaan a tumtumpaw nga insuko iti maysa a mangngalap iti Barangay Patar ili ti Bolinao, Pangasinan idi Lunes ket shabu nga agdagsen iti agarup 16.5 kilos ken aggatad iti PhP112.2 million. Daytoy ket naibatay iti maysa a screening report ti Pangasinan Provincial Forensic Unit, imbaga ni Agno Police Station officer-in-charge Capt. Ross Brian Marmeto iti maysa nga interbiu iti telepono idi Mierkoles.

Kinuna ni Marmeto nga iti pagkargaan ket nasarakan ti maysa a 29- anyos a mangngalap manipud ili ti Bolinao idi napan a Domingo. “Insukona ti pagkargaan iti Agno Police kabigatanna idi nagsubli manipud panagkalap. Naiproseso daytoy ken dagiti resulta ket rimmuar idi rabii ti Martes,” kunana. Imbaga ni Marmeto nga imbestigaranda pay laeng iti nagtaudan ti pagkargaan ken no kasano a nagpatingga dayta iti taaw.

“Mabalin a saan a mainaig dayta kadagiti napalabas a nasarakan a pakete yantangay ta nagduduma dagiti
pagkargaanda ngem ag-verify kami pay laeng,” kinunana, tuktukoyenna iti nasurok PhP642 million a gatad dagiti pakete ti shabu a nasarakan a tumtumpaw iti aplaya ti Ilocos Region idi maudi a paset ti Hunio ita a tawen. Imbaga ni Marmeto nga iti mangngalap a nangisuko iti banag ket gunggonaan ti Philippine Drug Enforcement Agency (PDEA) ken iti local government unit ti Agno.

Iti daytoy a kaudian a pasamak, nagapelar ti opisial ti police iti publiko nga isuko kadagiti autoridad iti aniaman a
pagkargaan wenno pakete a makitada a tumtumpaw iti taaw, nga ipaganetget iti kinapateg ti pananglapped iti panagwaras kadagiti kalsada.

(HA-PNA Ilocos/PMCJr.-ABN)