P2.8-M ilegal a droga, inuram ti PDEA iti LU

September 11, 2017 Headlines

CAMP DIEGO SILANG, LA UNION – Nagdapo ti agdagup P2.8 milion a balor ti maiparit nga agas a pakaibilangan ti shabu ken marijuana iti maysa a ceremonial burning nga indauloan ti Philippine Drug Enforcement Agency (PDEA) regional office 1 iti Barangay Carlatan, siudad ti San Fernando ditoy a probinsia, idi Setiembre 5, 2017.
Kinuna ni Bismark Bengwayan, PDEA-1 information officer, ti eksakto a balor ti ilegal a droga ket P2,819,428.68 a pakairamanan ti 321.7077 gramo ti shabu (methamphetamine hydrochloride) nga aggatad ti P1,930,246.20 ken marijuana nga aggatad ti P889,182.48.
Innayon ni Bengwayan a dagiti nasao nga ilegal a droga ket nakolekta manipud kadagiti nagduduma a korte iti Rehion I ken nagserbi kas ebidensia ti nagduduma a kaso ti panaglabsing iti Republic Act 9165 wenno Dangerous Drugs Act of 2002.
Ti ceremonial burning ket paset ti pannakaobserbar ti 23rd National Crime Prevention Week.
Nakipaset iti ceremonial burning ti La Union Police Provincial Office, National Police Commission, ken probinsial a gobierno ti La Union. ERWIN BELEO / ABN