P36.6-M SHABU, MARIJUANA NAKUMPISKAR TI ILOCOS POLICE IDI ABRIL 2024

May 3, 2024 Headlines

MALASIQUE, Pangasinan

Agdagup iti PhP36.6 million a gatad ti shabu ken marijuana iti nakumpiskar bayat iti nadumaduma nga operasion ti Ilocos Police Regional Office (PRO-1) manipud Abril 1 agingga 30, 2024. Iti maysa a pagsasao idi Huebes, imbaga ni Lt. Col. Benigno Sumawang, deputy chief ti PRO-1 Regional Community Affairs Development Division a nangikonduktada iti 95 nga operasion a nagbunga iti pannakakumpiskar ti 84,300 mula a marijuana, 2,589.58 gramo iti nagango a bulong ti marijuana ken 2,864.37 gramo ti shabu.

Kinunana a 106 suspek ti naaresto met. Maysa kadagiti kangrunaan nga anti-illegal drugs operation ti regional
police office, iti koordinasion ti dadduma a law enforcement agencies, ket iti panangpaksiat iti lima a plantasion ti marijuana iti Sitio Tangilig, Barangay Banga, Sugpon, Ilocos Sur idi Abril 12, a nagbunga iti 26,700 piraso ti naan-anay a dimmakkel a mula a marijuana nga addaan market value a PhP5.3 million. Idi Abril 13, dinadael dagiti
autoridad iti 11,200 naan-anay a dimmakkel a mula a marijuana nga addaan napattapatta a gatad nga PhP2.2 million iti kabambantayan ti Barangay Licungan, Sugpon, Ilocos Sur.

Imbaga ni Sumawang a nakakumpiskarda met iti PhP9.3 million a gatad ti marijuana kadagiti pabeddengan ti
Benguet, Ilocos Sur, ken La Union idi Abril 16. Agdagup ti 46,600 naananay a dimmakkel a mula a marijuana iti pinarut ken dinadael kadagiti uppat a lugar kadagiti pagbeddengan ti Badeo, kibungan Benguet; Barangay Licungan, Sugpon, Ilocos Sur; ken Barangay Tubaday, Santol, La Union nga addaan napattapatta a kalawa ti daga nga 4,000 metro kuadrado. Idi Abril 20, iti naisina nga operasion ti police ket nangiturong iti pannakatilliw ti uppat a suspek idiay Vigan City ken Dagupan City, ken nagresulta iti pannakakumpiskar ti 61 gramo ti shabu nga aggatad PhP414,800.

Imbaga ni Sumawang a tallo nga high value individuals ti nakemmeg iti maysa a double drug-bust operation idiay
Pangasinan ken Ilocos Sur idi Abril 22 a nagresulta iti pannakakumpiskar ti 102 gramo ti shabu nga aggatad
PhP693,600. Malaksid ti panangkissay tis uplay kadagiti ilegal a droga, kinuna ni Sumawang a nabilinan met iti puersa ti police a tulungan dagiti agus-usar ti droga babaen iti panangallukoy kadakuada nga agpasidong iti maysa a
rehabilitation program.

Iti nabiit pay nga interbiu, imbaga ni PRO-1 director Brig. Gen. Lou Frias Evangelista a pinagbiag manen ti PRO-1 iti pannakaipasdek kadagiti checkpoints kabayatan ti pandemia tapno ad-adda pay a mapabileg iti kampania kontra kadagiti ilegal a droga. “Awanantayo iti panangaramid ti ilegal a droga ditoy rehion isu nga dagiti suplay ket aggapu manipud ruar dayta ti gapuna, masapul a bantayantayo dagiti beddengtayo,” kinunana.

(HA-PNA Ilocos/PMCJr.-ABN)