P642M ILIGAL A DROGA A NASARAKAN ITI BAYBAY TI ILOCOS SUR DINADAEL TI PDEA

July 13, 2024 Headlines

SIUDAD TI VIGAN, Ilocos Sur

Indauluan ti Philippine Drug Enforcement Agency (PDEA) Ilocos Region iti pannakadadael ti PhP642,732,0202 million a gatad ti iligal a droga iti maysa a krematorio idiay Don Lorenzo Querubin, Caoayan, Ilocos Sur idi Hulio 9.
Dagiti nadadael nga iligal a droga ket nagtaud manipud iti panagregget dagiti mangngalap ti Ilocos Sur manipud Hunio 24 agingga Hulio 6, ken dagiti nakumpiskar a droga ket agserbi kas ebidensia kadagiti kaso manipud nadumaduma a lugar ti Ilocos Region a nalpasen ken nasolbar, kinuna ni PDEA-1 Regional Director Joel Plaza.

Kinunana, “Iti pinagtitinnulongtayo ita ket maysa a testamento iti publiko nga ad-adda a nasiputtayo ket daytoy ket maysa a pammasiguro kadagiti komunidad tayo nga itultuloytayo ti agimbestigar kadagitoy a sindikato.” Imbaga ni Plaza a panggepna a siguraduen iti publiko nga iti nakumpiskar ken naisuko a droga ket saan a pulos a mausar manen wenno maisubli kadagiti kalsada a maitunos iti panangiwanwan iti panangaywan ken disposision iti nakumpiskar a dangerous napeggad a droga iti sidong ti Section 21, Article II ti Republic Act 9165 wenno iti
Comprehansive Dangerous Drugs Act of 2002 ken Dangerous Drugs Board Regulation No. 1, series of 2002.

Ti dagup a timbang dagiti droga ket mapattapatta 108,805.2407 gramo, nga iti “shabu” iti kadagsenan nga 94,210.9493 gramo, nga aggatad ti agarup PhP640.6 million. Mainayon pay, dagiti pakete ti marijuana nga agdagsen iti 14,594.2914 gramo nga aggatad iti PhP1.7 million, ken ti 250ml liquid shabu nga aggatad iti PhP346,250 a nasarakan idiay Agno, Pangasinan ket napuoran met. Ti pannakadadael dagiti maiparit a droga ket naaramid babaen iti thermal decomposition nga addaan temperatura a nasurok nga 1,000 degrees centigrade.

Daytoy a proseso a masinasina iti amin a napeggad a droga ket saanen a maisubli. Agingga Hulio 6, naireport ti PDEA dagiti serye ti pannakatakuat iti dagup 94 pakete ti shabu a tumtumpaw iti baybay iti munisipio ti San Juan,
Santa Maria, Magsingal, Caoayan, Cabugao, San Esteban, ken Santa Cruz ti probinsia ti Ilocos Sur, no sadino nga iti
umuna a naireport a pannakakita ket idiay ili ti San Juan idi Hunio 24. Iti mensahena, nagyaman manen ni Governor Jeremias Singson kadagiti mangngalap a nangipakita iti naisangsangayan a tured ken integridad iti
boluntario a panangisuko kadagiti pakete ti shabu a nasarakanda iti sakoptayo a baybay.

“Ti panangisuko kadagitoy a napeggad a droga ket napateg nga uddang iti di agsarday a pannakidangadang tayo kadagiti maiparit a droga. Nabileg a mensahe daytoy, a datayo, kas maysa a probinsia, a saan tayo ipalubos iti kaadda dagitoy a makadangran a substansia ditoy probinsia tayo. Saanda a masolbar ti isyu [PDEA ken PNP] nga
agmaymaysa, kasapulan iti komprehensibo nga estratehia a karaman iti pananglapped, edukasion ken pannakipaset ti komunidad. Naikumit ti gobierno ti probinsia tayo a naipamaysa nga agtrabaho kadua dagiti amin a maseknan
tapno maipatungpal dagiti programa tapno tamingen dagitoy a nadumaduma nga aspeto,” kuna ni Singson.

Kalpasanna inulitna iti awag ti gobierno para iti nabingbingay a responsibilidad ti publiko nga agtitinnulong, agtalinaed a nasiput, ken mangsupsuporta iti maysa ken maysa iti agtultuloy a laban tapno magun-od iti maysa nga
awanan-droga nga Ilocos Sur.

(JMCQ PIA Ilocos Sur/PMCJr. ABN)