P7.5-B eco-waste to energy pinasinayaan sa La Union

January 28, 2019 Headlines

STO TOMAS, LA UNION – Tinatayang magsisimula na ang pagpapatayo ng P7.5 bilyong halaga ng proyektong eco-waste to energy sa Pebrero 8, 2019.
Ito ay matapos na pinasinayaan ng mga lokal na opisyal ng bayan ng Sto Tomas at ng proponent ang proyekto noong nakaraang linggo.
Sa panayam ng Amianan Balita Ngayon at ng ilang miyembro ng mga media sa La Union ang eco-waste to energy na pasilidad ay maaaring komolekta ng mahigit na 2,800 na tonelada ng basura na manggagaling sa iba’t ibang lugar sa Northern Luzon at maaaring makapag-generate ng 45 megawatts ng elektrisidad sa buong Region 1.
Bukod dito ay magtatayo rin ng windmills ang naturang kompanya na pinamamahalaan ni Engineer Frederick Tuazon, na tubong Agoo, La Union. Ang proponent na kompanya ay ang T-11 Corporation at ang construction arm nito ay ang Alta Construction Corporation.
Ayon kay Tuazon, matagal na nilang pinag-iisipan at pinag-aralan ang problema sa basura hindi lang sa lungsod ng Baguio kundi maging sa buong bansa, subalit aniya ay uunahin nilang itayo ang naturang pasilidad sa lalawigan ng La Union at unti-unti ay daldalhin nila sa iba’t ibang lugar sa bansa upang mabigyan ng solusyon ang problema sa basura na kung saan ay ito na ngayon ang pinagtutuunan ng pansin ng mga opisyal ng bansa at maging si Pangulong Rodrigo Duterte ay lubhang nababahala sa pagdami ng tone-toneladang basura sa bansa na kung saan ay nagiging sanhi ng pagbaha sa iba’t ibang dako ng bansa.
Sa lungsod ng Baguio na lang ay halos gumagastos ng P100 milyon upang itapon lamang ang basura sa bayan ng Capas, Tarlac o sa siyudad ng Urdaneta, Pangasinan subalit sa paglipas ng panahon ay naging problema na rin ng bayan ng Capas at Urdaneta ang kanilang mga basura.
Sinabi naman ni Tuazon na ang construction period ng pasilidad ay aabot ng mahigit na isang taon sapagkat ang kanilang itatayong eco-waste to energy ay isang top of the line na pasilidad na magsasagawa rin sila ng eco-park sa bayan ng Sto Stomas upang maging atraksyon din ito sa turista.
Maging ang mga opisyal ng BLISTT ay inimbitahan ni Tuazon upang masaksihan nila ang kanilang presentasyon sa kanilang pasilidad na maaaring maging sagot aniya sa problema ng basura sa BLISTT area. Hindi aniya maitatago na lubhang dumami ang residente ng lungsod at ng BLISTT na siyang magiging sanhi rin aniya ng pagdami ng basura.
Sa ngayon, ani Tuazon, ay nagsasagawa na sila ng information dissemination sa buong Norte upang bigyan ng kaalaman ang mga lugar na ito na may eco waste to energy na itatayo sa lalawigan ng La Union. Idinagdag pa niya na, “I assured our kababayan here in the North that we are the lowest company to charge the tipping fee and aside from this, we will donate garbage trucks to our clients to assure that their garbage will be properly collected”.
Open arms naman itong tinanggap ng mga opisyal ng La Union dahil alam nila na ito rin ang makakapagbigay ng solusyon sa kanilamg problema sa basura na kung saan ay maaaring mademanda ang mga lokal na opisyal kapag hindi nila napangasiwaan nang maayos ang kanilang kapaligiran na sanhi ng sobrang basura at karumihan ng paligid na nakapaloob sa Republic Act 9003 o Ecological Solid Waste Management Act.
ABN/Thom Picaña