Pagbabago kanu!

March 18, 2017 Opinion Sirmata ken Tagtagainep ni Mang Gusting

Halo, halo, halooo… unayen dungngo ta kalgaw manen ket uso manen ti panagdugso-dugsol este kiwar-kiwar kunami koma ti halo-halo a makan nangruna iti lowlands wenno iti patad Kayong Angkuan, ket makakuarta manen ni Manang Anneng a nagaget nga aglako iti halo-halo dita sango ti store ni Ikit Juana.

Apo, adda man malagipko Kayong Angkuan, kumusta met dagiti kakailian tayo a mangop-opisina kadagiti government offices? Ania ngay, Uliteg Miniong, kumusta met ti trabahom idiay kapitolyo. Naimbag a no very punctual ka latta met a sumsumrek, amangan no maysaka met kadagiti pasaway. Saan met ketdi nga amin ngem, sus maria kusina, addan dagiti naipadpadamag a mangop-opisina a naladaw la ngaruden a simrek, no anianto pay laeng ti ar-aramidenna…iruar na ti sarming manipud iti bagna ket pintor-pinta dita iti pamay-anna iti rupana imbes koma a mangrugin iti trabahona. Adda met dagitay imbes nga agtrabahoda, naladaw da la ngaruden ag-games da pay laeng. Opssss, batu-bato sa langit a kunada, ang tamaan ay bukol este huwag magagalit. Puwera delos buenos ngem, adda dagiti nadismiss kas kada nasuspende gapu ta natiliwan dagitoy nga agay-ay-ayam iti games iti computer bayat ti oras ti trabaho. Hay naku, naku, naku! Awanan kayo iti daldalem kas kada batikuleng, sayang laeng ti maisu-sueldo ti umili kadakayo. Apay, masosuelduan kayo aya nga agi-games laeng kadagiti opisinayo, anak ng – hueteng kayo! Di kay la mabain kadagiti bagbagiyo, de adal kayo pay met ngarud. Professional kayo pay met ngarud a makuna ngem adda met dita dapan yo ti nagadalan yo ta awan babain yo. Opssss, sus ina aya, ngumato ti royal blood ko no kastoy a kanayon.

Ammoyo kadi pay no ania ti pagluksawan tayo la unay, Kayong Angkuan, adda ngamin linakadko a papeles ti titulo ti bassit a nagsaadan ti kalapawmi. Ngem, anian…ta nagsapa kami a napan, no labsem ti agsao, segundo laeng ti apaglabes ti alas otso, addakamin iti nasao nga opisina. Nagdamag tayo iti kasapaan nga empliado no ania nga opisina ti papanak. Insurodak iti akin-baba a kagsaaran…ditoyen ti ayan ti imasna Kayong Angkuan, daytoyen ti makapaluksaw, trainees ken ti laeng janitor ti nadanunmi. Ngem ti talaga a makapaluksaw, isu ti panaguray tayo iti nagbayag. Agasem ta dandanin alas nueve idi dumteng ti kaunaan nga empliado. Ti dakesna ket idi agdamag tayo kenkuana, binaonnak iti kadsaaran a naggapuak. Immuli tayo manen a kapilitan.. Okey, inasikaso datayo ngem ti imasna, saan kanon a ditoy ti ayan ti gagarak. Ngarud, napanak manen iti impatuldoda nga opisina. Ngem saan a dayta ti pakaluksawak la unay, Kayong, ngem ketdi, isu’t panaguray tayo iti nakurang a maysa nga oras iti kaunaan nga empliado, kalpasanna saan met gayam a daydiay nga opisina ti ayan ti gagarak? Salbag ni ayat ketdi!

Ayan ita ti nakuna ni President Digong a pagbabago? A kangrunaan ti nasayaat a serbisio kadagiti umili nangruna kadagiti opisina ti gobierno? Sus mariosep, kasano nga adda pagbabago kadagitoy nga opisina ket awan met ti pagbabago kadagiti maseknan nga empliado. Koma, umuna ti panagbalbaliw kadatayo a mismo. Addanto pay nasukalan da idi, awan iti opisinana, ti ammoda ket adda meeting na gayam adda idiay wagwagan!

Oppsssss, dakesen, Kayong Angkuan, kakadua a senyor citizens ditoy sango ti store ni ikit Juana. Naimasak manen ti nagsodsod iti halu-halo este nagistorya. Surotennak to man ngatan iti binalsig a pagsungrod ni Sofing. Nalipatak manen tay pagatgatangna a manteka ken itlog a pamigatan mi…adu pay koma ti innak istoryaen ngem, ala babayooo. Tsuptsup muahmuahhh.