Pagbibigay ng discount sa mga solo parent, isinusulong

April 25, 2017 Latest News

LUNGSOD NG BAGUIO – Sa pangunguna ni Bise Alkalde Edison Bilog ay isinusulong sa lungsod ang pagbibigay ng discounts sa mga solo parents na may sahod na mababa pa sa P250,000.
Ayon sa Gabriela Womens Party, ang solo parent ay isa sa mga marurupok na miyembro ng lipunan dahil bilang tagapangalaga ng kanilang mga anak nang nag-iisa ay isang mahirap na trabaho lalo na sa kahirapan sa ekonomiya, kawalan ng trabaho at inflation.
Sa kagustuhan ng pamahalaang lokal na makasabay ang mga solo parent sa mga gastusin at edukasyon ng kanilang mga anak ay dapat magkaroon ng benepisyo sa mga solo parents sa pamamagitan ng 10 porsyentong discount upang mabawasan ang pasanin sa mag-isang pagpapalaki ng anak at upang masiguro na ang kanilang mga anak ay mabigyan ng oportunidad para sa magandang kinabukasan.
“Layunin nito na matulungan natin ang mga solo parent dito sa lungsod ng Baguio sa pamamagitan ng pagbibigay sa kanila ng benepisyo,” ani Bilog.
Ayon pa sa kanya, mayroong apat na uri ng tulong para sa solo parents. Una ay ang programa sa pangkabuhayan na bibigyang prayoridad ang mga solo parent na sumali sa mga ganitong programa. Pangalawa, ay ang paglalagay ng solo parent assistance desk sa lahat ng barangay dito sa lungsod kasama na rito ang pagkakaroon ng pagkakataon na bumuo ng kanilang organisasyon bilang isang solo parent. Ikatlo ay ang funeral o death benefit para sa mga namatay na solo parent o anak nila na kapag natural death ay bibigyan ng gobyerno ng P10,000 at kung accidental death naman ay may P20,000. Lalo na kapag ang solo parent ay namatay, makakatanggap ang kanyang anak na menor de edad ng P5,000 at karagdagang benepisyo. Ang pang-apat ay ang discount kung saan lahat ng mga binibili nila para sa mga gatas ng bata, gamot at pagpapakonsulta sa doktor at iba pang bilihin ay mabibigyan ng 10 porsyentong discount.
Ang makakatanggap ng 10 porsyentong discount ay ang mga residente ng lungsod ng Baguio at may mababang sahod o annual income na P250,000 o mababa pa. Kailangan lamang kumpletuhin ang kaukulang requirements para sa mga nais mag-avail o magrehistro na maaring dumulog sa tanggapan ng gobyerno.
Samantala, may karampatang parusa ang nakahain para sa mga lalabag sa ordinansa na may multang P5,000 para sa mga magpepeke ng dokumentong nagsasaad na sila ay solo parent.
Ang naturang proposed ordinance ay pumasa na sa unang pagbasa sa Sangguniang Panlungsod. Liezel Eunice Callejo, UC Intern