Pagbubukas ng Kennon Road sa maliliit na sasakyan, bawas trapiko

Iginiit ng lokal na pamahalaan na ang pagbubukas ng Kennon Road sa light vehicles ay makakatulong sa pagpapaluwag sa traffic congestions sa Marcos highway at iba pang kalsadang patungo sa Baguio City, lalo na sa inaasahang pagdagsa ng mga bisita para sa 24th edition ng Panagbenga sa Pebrero 2019, ang taunang alumni homecoming ng Philippine Military Academy (PMA), mga graduation rites ng magkakaibang unibersidad at kolehiyo, at sa paggunita ng Semana Santa at summer vacation sa lungsod.
Sinabi ni Mayor Mauricio G. Domogan na ang Kennon Road ay nagtamo ng mas malalang pinsala bunsod ng natural calamities mula pa noong July 16,1990 killer earthquake ngunit ito ay agad naibukas sa vehicular traffic kaya walang rason ang Department of Public Works and Highways-Cordillera (DPWH-CAR) at mga nagpapatupad ng proyekto nito para maantala ang pagbubukas ng kalsada sa light vehicles.
Inihayag ng mayor na ang isyu na inirereklamo ng publiko ay ang masyadong mahabang panahon na pagsasara ng Kennon Road, maliban pa sa usad-kuhol na pagpapatupad sa rehabilitation projects sa naturang kalsada.
“We cannot afford to continue closing Kennon Road to vehicular traffic because it will create a negative impact on the city’s tourism industry.
While the DPWH was able to open another access road leading to Baguio city, the opening of Kennon road to light vehicles is still necessary the soonest,” ani Domogan.
Ang Kennon Road ay nananatiling pinakamaikling daan mula at patungo sa lungsod ng Baguio dahil maaaring lakbayin ang 23- kilometrong kalsada nang mas mababa sa isang oras habang mahigit isang oras naman kung dadaan sa Marcos highway o sa bagong bukas na Tubao-Nangalisan-Baguio road.
Ayon sa mayor, hindi makatwiran para sa mga opisyal ng DPWH-CAR na irason na ang central office lamang ang may kapangyarihan na ibukas ang isinara nito dahil nawawalan ng kwenta ang pagkakaroon ng regional office ng ahensya kung isasaalang-alang na dapat itong magbigay ng nauukol na payo sa mas mataas na otoridad sa kung ano ang dapat na gawin.
Nauna rito, nakita ng DPWH-CAR at Bureau of Design ang 9 critical sections ng Kennon road na kailangang isailalim sa rehabilitasyon upang masiguro ang kaligtasan ng mga motorista matapos na malalang napinsala ang mga naturang bahagi ng kalsada sa isang buwang habagat noong Agosto, at pananalasa ng mga bagyong Ompong at Rosita noong Setyembre at Oktubre.
Maliban sa shotcreting ng klondikes section ng kalsada, ang iba pang proyektong ginagawa sa Kennon road ay ang paglalagay ng Camp 5 bridge, repair at rehabilitation ng mga tulay sa Camp 1 at Camp 6, at ang slope protection wall projects sa magkakaibang bahagi na naapektuhan ng mga nagdaang sama ng panahon.
BAGUIO PIO/ABN

Amianan Balita Ngayon