Pagsiyasat sa tobacco excise tax fund, pamumulitika lang

May 7, 2017 Provincial

Binatikos ni Ilocos Norte Governor Imee Marcos si Ilocos Norte second district Representative at House Majority Floor Leader Rodolfo Farinas na namumulitika lamang ito sa pag-akusa sa gobernador ng hindi wastong paggamit sa P66.5 milyon na tobacco funds.
Sa isang good government committee hearing ng House of Representatives sa naturang diumano’y iregularidad ay sinabi ni Fariñas na inayunan ni Gobernador Marcos ang pagbili sa 115 assorted motor vehicles noong 2011 at 2012 “without the benefit of public biddings.”
“She was both the requesting officer and the approving officer. The huge amount was released in three tranches to two disbursing officers in the form of cash advances. A major purchase through a cash advance is a violation of the procurement law and the auditing code,” ani Fariñas.
Ang naturang pagsisiyasat ay bunsod ng Resolution 882 na inakda ni Fariñas at dalawang deputies nito na sina Pampanga Reps. Juan Pablo Bondoc at Aurelio Gonzales Jr. ng House Committee on Good Government and Public Accountability.
Ngunit kinondena ni lawyer Joseph Cadiz, legal counsel ni Marcos, si Farinas. “This is premature politicking. These are irresponsible conclusions.”
Si Farinas ay isang long-time political ally at personal na kaibigan ni dating Sen. Ferdinand Marcos Jr., ngunit nasira ito nang tumakas sa bansa ang mga Marcos noong 1986.
Ang parehong pamilya ng mga politiko ay aktibong political ally ni Pres. Rodrigo Duterte.
Sinabi nila Farinas, Bondoc at Gonzales Jr. na ang unang cash advance ng P18.6 milyon ay nangyari noong Disyembre 1, 2011 para sa pagbili ng 40 units ng mini-cab na ipapamahagi sa iba’t ibang barangay sa Ilocos Norte.
Ang pangalawa na P15.3 milyon ay ginawa noong May 25, 2012 upang pambili ng limang second-hand buses habang ang pangatlo na P32.55 milyon ay naganap noong Sept. 12, 2012 para naman sa 70 units ng Foton mini-trucks.
Kinondena ng mga kapanalig ni Gov. Marcos sa Sangguniang Panlalawigan ang naturang pagsisiyasat ng Kongreso sa pangunguna ni Farinas at sinabing isa lamang itong “fishing expedition”.
Isa ring abogado at miyembro ng provincial board na humiling na huwag pangalanan ang nagsabi na kung totoo nga ang akusasyon, bakit pa mag-iimbestiga ang Kongreso at hindi na lang agad magpila ng kaso sa Ombudsman.
Samantala, pinanindigan ni Sangguniang Panlalawigan member Domingo Ambrosio na walang iregularidad sa pagbili ng provincial government ng mga naturang sasakyan gamit ang bahagi nito sa RA 7171 tax. Aniya ay handa sila na humarap sa anumang imbestigasyon.
Kaugnay nito ay hiniling ng tobacco farmers sa Ilocos region at Abra province para sa full audit sa lahat ng proyekto na iniaward ng National Tobacco Administration (NTA) sa pamamagitan ng local government units. Ace Alegre / ABN