Palarong Pambansa: Tinimbang ka ngunit kulang

September 30, 2017 Editorial

Kung gaano karubdob, kapursige at punong-puno ng pag-asa na makukuha ng lungsod ng Baguio at Benguet ang pagiging host ng 2018 Palarong Pambansa dahil sa unang pagkakataon ay nagbuklod-buklod at nagkaisa ang iba’t ibang sektor, mga ahensiya ng gobyerno, pribadong institusyon, prominenteng grupo at kilalang mga indibiduwal upang mapalakas ang dagundong ng pagnanasa natin na makuha ang pagho-host ng taunang palaro.
Naging matibay pa ito nang ipahayag ni PCOO Secretary Martin Andar na suportado niya ang laban ng lungsod at probinsiya ng Benguet.Sampu ang ibinidang bentahe natin at naging ‘selling point’ upang makumbinsi ang komite na huhusga kung sino ang mananalong host ng Palarong Pambansa, pinamagatan itong ‘Ten Hottest Reasons for the Coolest Palaro Ever’ – ipamumukhang best sports-tourism site ang Baguio at Benguet, home of world champions and international stars, rich cultural heritage and vibrant art scene, cradle of the world-renowned festival and world records, with world-class venues and accommodations, athlete-friendly billeting centers, first-rate medical services, educational hub of the north at bilang mga lugar ng steadfast solidarity.
Hindi umubra ang ginaw, hindi kinagat ang ‘The Coolest Palarong Pambansa’, bakit? Ano ang dahilan? May kulang pa ba?Sinabi pa na may pagyayabang ni Mayor Mauricio Domogan noon sa kainitan ng pagpupulong ng mga nagsusulong ng ‘The Coolest Palarong Pambansa’ na ang Baguio at Benguet ang pinakamagandang lugar sa sports training patunay dito ang naging pagsasanay ni world boxing champion Manny Pacquiao na nananalo sa laban tuwing nagsasanay sa lungsod.
Ayon kay Domogan ay hindi natalo kahit minsan si Pacquiao at natalo lamang siya nang tumigil itong mag-training sa Baguio. Nananalo raw si Pacquiao dahil sa nagsasagawa raw sina Domogan ng ‘canao’.Nakalimutan yatang magdaos ng canao sina Mayor Domogan kaya natalo tayo sa bidding?
Pero walang biro, ang nakikitang dahilan maliban sa malakas talaga ang kampanya ng Vigan, Ilocos Sur dahil na rin marahil sa suporta ni dating Governor Luis ‘Chavit’ Singson na maaalala nating naging malakas na instrumento sa pagkakapanalo ng Pilipinas na dito idaos ang Miss Universe 2016 ay hindi talaga naging sapat ang pagkumbinsi dahil sa maaaring isinaalang-alang ng komite ang problema sa trapiko, ang kakulangan at hindi maayos na lugar ng palaruan, kakulangan at hindi maayos na tutuluyan ng mga atleta at delegado at iba pang bagay na ikinonsidera nila.Sa totoo lang ay mas maayos, mas maganda, mas maluwang at higit sa lahat ay makabago ang mga pasilidad sa palakasan ng Ilocos Sur kaysa sa atin.
Ito ang kulang sa atin kaya kailangan ng ituloy ang pagpapaunlad at pagsasa-ayos sa lahat ng kinakailangang pasilidad para sa palakasan upang sa susunod mang maki-bidding ang Baguio at Benguet ay hindi na ‘Tinimbang ka ngunit kulang’ kundi tamang-tama na sa panimbang ng mga opisyal ng Palarong Pambansa. PMCJr.