Panagayunar?

Naimbag nga agsapa, aldaw, malem wenno rabii kadakayo amin kabaranggayan, kakayong, gagayyem ken saan nga amammo.

Sumangbay manen kadagiti nadayaw a matmata yo toy kolum tayo ket sapay la koma ta naikkaten dagiti sangkap kadagiti mulagat yo.

Kumusta kayo metten Kakayong? Di pay la nalnalpas ti makuna a Semana Santa ket dandani minalemen ti todo.

Gapu ngata ta adda makuna nga LPA iti nagbeddengan ti pagilian iti sabali a lugar, wenno tay kunada a PAR? Wenno talaga a nagbalbaliwen ti paniempona a kunada.

Ala, ania man kadagita ti puon ken gapuna a dandanin minalem nga agtodo kadagiti nagduduma a paset ti pagilian, pagyamanan tayo ti Dios a namarsua, ta bendision daytoy.

Semana Santa, maysa a naindaklan a panawen. Panagayunar kunada, ngilin, ket malagipko la unay idi dakami ti agtutubo. Basta nadanun ti Huwebes santo agingga iti Biernes santo, agtalinaed kami iti balay.

Awan aglalaaw, awan aglalamngay. Sakbay dayta a panawen, maisagana aminen a kasapulan. Pagsungrod, paginnaw, ken dadduma pay a trabaho ta ag-ngilin kuna dagiti nagannak kadakami.

Pulos a diak malipatan agdengngeg kadgaiti passion iti radio. Ditoy a mangngeg ti istorya ti pannakatiliw ni Kristo Hesus nga anak ti Dios ken Mannubot ti sangalubong.

Natiliw, nailansa iti krus ket nagungar. Kadagiti pakneng a Katoliko ken kristiano, ngilinen da la unay daytoy a panawen.

Ngem batu-batu sa langit, kadagiti agtutubo ita, adda pay ngata kasta? Awan la’t ammokon. Agjajaming da ketdi. Karaoke ditoy, inum idiay.

Hay Apo, pakawanem ida. Saan da nga ammo ti ar-aramiden da. Naiduma idi ken ita. Makuna laeng a ngilin itan ngem saanen a kas idi dagiti agtutubo ita ken uray dagiti nataengan.

Idi, maiparit ti agubra, ag-iggem iti patadem, ken agsida’t karne. Pasig a nateng idi. No saan pay ketdi, umanayen tay laya a maideppel iti boggoong.

Segun iti damage, kakayong, kaillian, imparit ti COMELEC ti panagakampania iti panawen ti semana santa. Asino man a matiliwan a mangaramid iti kasta kadagiti kandidato, adda kaibatuganna a pannusa, segun iti pammilin.

Ngem nadiskarte dagiti kandidato tayo. Adda dagitay mapan makiragragup latta nupay saan mo a makita ida nga agpasyar met a.

Kalpasan ti Semana Santa, dua lawas laengen, panagpipilin, Kailian. Kakayong, adda kadi naposuan yon a kandidato wenno botosan yo?

No siak, di pay la nangrugi ti makuna a campaign period ammokon nga agpapan local ken national candidate. Ammom lattan dagiti makuna a makabael wenno maikari a mangidaulo, mangibagi
kadatayo.

Ta no iti local, ammom latta metten ti kalidad tunggal kandidato ta kalugaram ida. Ammomon ti kunada nga inalatda. Adda latta met dagitay agsubli-subli.

Ngem adda man tay maysa a nabasak ken naisulek kadagiti bukilad ko. Saan kanu a pagbalinene a negosio ti pulitika. Unayen, negosio? No maysa ka kano a negosyante, saan mo met a serken ti pulitika ta no agkamkamali ka, mabangkrap ka.

Awan la’t di a kunada. Dakayo, kakayong, kabarangayan, ania ti kayat na sawen ti Negosio iti pulitika, ala man? Wen gayam, adda man bassit ipalsiit ko.

Saan laeng a ditoy barangay mi ngem ketdi, kadagiti dadduma pay a barangay iti siudad ti saleng. Kudos kadagiti opisyal a nangilungalong iti road widening kadagiti barangay road.

Ita, adda man damagenmi. Naipalawa kadi dagitoy a kalsada tapno adda pagpardaan da? Adda pay diay nakitami. Addan pintura wenno marka tay kalsada para iti parking portion na.

Imbes a limmawa, immilet met. Ken daytoy, asino ti responsable kadagiti makuna a dilapidated a lugan a nakaparada iti igid ti kalsada a di maik-ikat, makasali! makapa——mmmmmppppp!

Ala, Kakayong, kasta pay ta naimasan tayo manen. Babayoooo, tsuptsup, muahmuahh.

Sirmata ken Tagtagainep ni Mang Gusting

Amianan Balita Ngayon