Mangrugi manen ti tiempo a paguuray dagiti kakabsat a mannalon ngem iti sabali a bangir, pagdandangan met dagiti kakabsat tayo nga adda kadagiti narisgo a lugar.
Tudo, isu kasapulan dagiti kakabsat ken ingongoten tayo a mannalon kadagiti lugar nga awan padanunamna, ken uray kadagiti lugar nga adda padanum wenno irigasion.
Nu awan tudo, maatianan metten dagiti karayan a panagwidanda iti padanum isu a kasapulan tay la unay ti tudo a parabor ti Apo iti sangataon.
Iti met sabali a bangir, no dumteng ti kastoy a tiempo, adu ti madandangaan ta isu met ti isasangbay ti didigra a makuna nangruna iti bagyo.
Adu timabuteng ta adu dagiti napipigsa a sumangsangbay iti masakupan ti Pilipinas apagilian tayo. Adu ti possible a mapasamak. Layos, panagregaay ti bantay ken dadduma pay a didigra.
Ti makuna a natural calamity ket ditay pulos malapdan. Kadagitoy a tiempo wenno panawen, kuna dagiti managpaliiw adda dagiti didigra a ti pakaigapuanna ket gapu met laeng iti kinaranggas ti tao iti nakaparsuaan.
Kunada, panagsingiren ti nakaparsuaan ta pulos a ditay ilalaaen dagitoy a parabur ti Apo gapu iti kinaagum tayo. Kas koma iti panagpukan laengen iti kayo, bassit la unayen ti paset ti pagilian ti nabatbati a kabakiranna.
Saan met ngarud a basta nakalbo wenno napukaw dagiti kayo ngem ketdi, pinukan dagiti naranggas a loggers.
Adda met dagiti naputar a linteg tayo iti dayta, ngem apay ngata a di naipatungpal? Ta kasanu, kunada a dagiti met la kanu agtuturay wenno adda iti takem ti naglabsing ta isuda met ti akin-kukua kadagitoy a logging company wenno sawmill.
Hay naku, ita, adu dagiti napasaranen ti tao a panagreggaay a ti ibagada a gapuna ket gapu iti pannakakalbon dagiti kabakiran tayo. Apay ngarud a ditay isardeng? Ayan tay linteg a mangsakup iti dayta a panaglabsing?
Sipud adda puot ko, awan sa pay ti nabalud a loggers ania? Ditoy laengen ayan mi a batug ti langit. Idi kuna tayo manen, pine trees pay laeng ti makita kadagiti bantay, ngem ita ket pasig metten a yero wenno semento.
Iti ababa a sarita, pasig metten a babbalay. Ania pay ti namnamaem ngay kayong?
Saan pay ketdin nga agat-pine tree ti malang-ab ngem ketdi pasig lattan nga asuk nga ipugso dagiti lugan.
Sapay la koma kakayong ta saanen a maulit dagiti naglabas a napipigsa wenno super typhoon iti pagilian tayo a no sadino ket adu ti naipatli a biag.
Nagsasaruno a tawen ti kaadda dagiti nakaro a nadidigra nga super bagyo a makuna ket dandani nga intero a paset ti pagilian ket nakapasar iti kastoy.
Malaksid iti pannakapukaw ti biag, adu pay a sanikua ken pagbiagan ti nadadael.
July 1, 2019
July 1, 2019