Panagkakararwa!

November 4, 2017 Opinion Sirmata ken Tagtagainep ni Mang Gusting

Apooowww, drama tayo man pay Kakayong…
Iti naminsan, napan nakigalyera ni Danny ngem sinitar ti guardia iti gate. Ket—-
Guard: Amm…Manong, dimo mabalin ti sumrek ditoy galiera.
Danny: Apay kadi , Guard. Ania dayta?
Guard: Ngamin…upa met ta entry-m.
Danny: Di kay agdanag, Apo Guard, adda ngamin dita uneg tay dua nga annakna. Umayna la buyaen  ti labanda.

Kumusta kayon kakayong, sus, bayat a masursurat daytoy kulom tayo, adda metten a mangdaldalapus ti bagyo Ramil ket addan idiay Casiguran, Quezon. Makitam Kayong, Nobember-ren ngem adda pay latta dagiti bagyo na, isu a ne…ad-adda a lumammin ditoy siudad ti saleng. Talaga a makaikawa Kakayong.

Kalkalpas Kayong ti makuna a panagkakarawa este panagkakararwa. Piesta dagiti natay a kunada. Tiempo a panagbabakasyon tapno intay sarungkaran idiay kamposanto ti tanem dagiti patpatgentayo a pimmusayen. Kasta metten a panangsarungkar kadagiti sibibiag pay a patpatgen tayo iti biag. Daytoy ket tinawen nga intay laglagipen wenno ilaglagip. Ngem iti siudad ti Baguio Kayong, nasuroken a 40 anyos ta ditoy, no saanak a nagriru dayta dua a tawen seguro mabalin a dayta a bilang ti saanna a panagtodo no bisperas wenno kaaldawan ti piesta dagiti natay. No panunoten, awan met ketdi kadatayo dayta, masmasdaaw tayo laeng.

Kangrunaan a dumlawan tayo ket isu ti panagbaliw a talaga ti panawen, ta no dumteng idin ti Oktobre wenno Sietembre pay laeng malang-ab mon ti palayopoy manipud Siberia a no sadino ket nasalemsem ken naidumduma a pul-oy a mangabbukar rikna a kunada ta daytoy ti pasimudaag ti paskua. Ngem apay ngay ita ket sabali nga angin ti dumteng ta makadidigra met, bagyo ti kayatmi a sawen, ta ti napuotantayo a panagbabagyo idi ket agpatingga laeng iti bulan ti Agosto wenno apagtapug ti Setiembre.

Ngem ala, awan mabalintayo ta subeg, sulpeng ti tao. Kangrunaan ti amin, manmanu ti mangisakit ti nakaparsuan. Manmanu ti mangsaluad iti kinangayed ti parabor ti Apo kadatayo. Naranggas tayo…agum ta pan-sarili laeng  a kunada. Kas koma dagiti buwaya a nangkalbo iti bantay tapno bumaknangda laeng babaen iti panag-logging da. Dagiti nagdadakkel a pabrika nga agipugso iti asuk, mangnayon dayta  iti ibabara ti lubong nga agresulta iti panagbaliw ti panawen. Nga agpapan kenka Ikit Juana, ulitek manen, saanmo a pupuoran dagiti naregreg a nagango a bulong dagiti moyong yo iti arubayan. Urnongem ta igabsuon mo iti puon da ta aglungsot nga isu met laeng ti agsubli a taraun ti mihorasmo wenno mulam a kayo nga agbunga. Kasta ti cycle ti biag ditoy lubong, agsubli tayo met laeng iti naggapuan tayo kasta met kadagiti amin a sibibiag ditoy rabaw ti daga. Kasta met kadagiti sulpeng a sadut a mapan agibasura imbes a mapanda ibasura saan ta puoranda nangruna kadagiti plastic, hay naku.

Ngem, saan pay a dayta ti pagsaritaanta Kayong. Ngem ketdi, dagiti naglabas a parikut iti nagduduma a paset ti pagilian nangruna iti Marawi City. Kabasbasak laeng ti kabaruanan a damag, napatay kanun ti military ti makannawan nga ima ni Hapilon Isnilon…ala ket, seguro dayta ti naikeddeng a gasatda, ah…ania ngarud. Kasta laeng ti biag, adda kubbo adda kiad. Kunada, no agbibiagka iti bala, matayka met laeng iti bala. Hay naku, orasna manen. Ala, baliwan tayto man la ti aginnistoryan ta yawidko pay daytoy manteka a ginatangko. Ala, babayo, tsuptsupmuahmuah.