PANAGSAGANA PARA ITI PALARONG PAMBANSA 2025 NAAN-ANAYEN

March 22, 2025 Headlines

LAOAG CITY

Dagiti panagsagana para iti hosting ti Ilocos Norte iti ninamnama unay a Palarong Pambansa 2025 ket naan-anayen, kinuna ti gobierno ti
probinsia idi Huebes, Marso 20. Iti maysa a pagsasao, kinuna ni Ilocos Norte Governor Matthew Joseph Manotoc a nakasaganan ti
probinsia a mangipaay iti nakallalagip a kapadasan para iti 15,000 a manamnama a makipaset iti pasamak, agraman dagiti atleta, coach, ken opisial.

Bayat a dandani amin a lugar ti kompetision ken dagiti eskuelaan a pagdagusan ket naisaganan, ti Ilocos Norte Tourism Office ket mangilista kadagiti residensial a pagtaengan iti probinsia a mabalin a pagdagusan dagiti delegasion ti torneo. “Dagiti interesado a makinkukua iti pagtaengan ket mabalinda nga ilista dagiti sanikuada a pagdagusan iti kaasitgan nga opisina ti turismo agraman ti address, contact person ken numero para iti koordinasion,” kinuna ni senior provincial tourism operations officer Xavier Ruiz.

Tapno mailista, kidkiddawen ti Provincial Tourism Office ti barangay clearance ti makinkukua, ti nairanta a gatad tunggal rabii, ken ti bilang dagiti nakasagana a kuarto nga addaan kadagiti kangrunaan a kasapulan kas iti agay-ayus a danum, koriente, banio, kosina ken lugar a panganan. Agingga iti Biernes iti maudi a petsa ti panagidatag malaksid no mapaatiddog. Ti Palarong Pambansa 2025 ket mangrugi inton Mayo 24 agingga iti Hunio 2.

Iti dagup a 289 nga accredited tourism service providers iti probinsia a naibatay iti kaudian a datos ti probinsial a turismo, kiniddaw ni Manotoc kadagiti umili ti Ilocos nga ibingayda dagiti pagtaenganda tapno mapadasan dagiti bisita iti marka ti kinamanagpadagus ti Ilocano. Pagaammo nga addaan ti Ilocos Norte iti sumagmamano a dadakkel a balbalay a saan unay a maus-usar ta kaaduan kadagitoy ket balbalay a pagbakasionan dagiti makinkukua nga agnanaed iti ballasiw-taaw.

“Parparegtaenmi ti pribado a sektor a makiraman iti Palaro ken agtitinnulong tapno makagun-od iti ad-adu pay nga isponsor tapno maisagana ti amin a banag ken nasayaat para kadagiti amin a bisita,” kinuna ni Manotoc kalpasan ti miting kadagiti kangrunaan nga
opisial. Dagiti engineering ken sports development offices dagiti local government unit ket nangaramid met kadagiti detalyado a panangsukimat kadagiti billeting center tapno masigurado ti natalged ken komportable nga aglawlaw para kadagiti atleta ken dadduma pay a delegado.

Ti gobierno ti probinsia ket nakikoordinar met iti Ilocos Norte Electric Cooperative (INEC) ken Primewater tapno masigurado dagiti saan a masinga a serbisio kadagiti maseknan a lugar. Kabayatanna, ti Ilocos Norte Provincial Police Office ket pinabilegna dagiti security
personnel-na ken nangbukel iti traffic scheme para iti umay a dakkel a pasamak.

(LA-PNA Ilocos/PMCJr.-ABN)