Pangasinan iti bukod a probinsia iti Rehion 1 a makaawat ti maikadua a paset ti SAP

June 28, 2020 Headlines

SIUDAD TI DAGUPAN – Bukod a Pangasinan laeng kadagiti uppat a probinsia ti Rehion 1 ti makaawat iti maikadua a paset ti Social Amelioration Program (SAP) a pondo manipud Department of Social Welfare and Development.
Kinuna ni Darwin Chan, information officer ti DSWD Field Office 1 nga 433,871 laeng a pamilia sadiay Pangasinan iti makaawat ti benepisio ti SAP nga PhP5,500 kas rekomendado ti Inter-Agency Task Force (IATF).
Babaen ti Executive Order No. 112 series of 2020, dagiti probinsia laeng nga naipasidong iti Community Quarantine (ECQ) status manipud Mayo 1 angingga 15, 2020 iti makaawat ti second tranche ti SAP benefits.
“Pangasinan lamang po dito sa Region 1 ang mabibigyan ng pangalawang ayuda ng gobyerno dahil ito lamang po ang nailagay under ECQ status from May 1-15,” kuna ni Chan bayat iti maysa a virtual forum nga indanguluan ti Kapisanan ng mga Brodkaster ng Pilipinas (KBP), idi Huwebes.
Kinuna ni Chan nga agarup 39,000 sangkabalayan ti probinsia iti adda iti ‘waitlist’ wenno dagidiay karaman koma iti first tranche ngem saan nga napatgan.
“Ang mga mabibigyan po ng second tranche ay yung mga nabigyan din ng unang tranche based on validation and cross matching at ang mga wait listed,” palawag ni Chan.
Kinuna na nga uray addaan bassit a pannakaladaw ti panagibunong, parpartakan ken araramidenda amin a kabaelanda nga maited ti kasapulan unay nga tulong para kadagiti Pangasinense.
Iti intero a pagilian, impakaammo ni DSWD Secretary Roland Bautista iti Laging Handa Network Briefing nga 1,336,635 benepisario a pamilia iti 4Ps ken waitlisted a sangkabalayan ket nakaawaten iti second tranche ti SAP.
Malaksid ti Rehion 1, sakop met ti numero iti listaan manipud rehion ti Cordillera ken Rehion 3 nga aggatad iti PhP6.746 bilion.
“We prioritized some regions in the distribution of the second tranche because these LGUs have submitted their liquidation reports early,” kuna ni Sec. Bautista bayat iti June 23 episode ti network briefing nga indanguluan ni Communications Secretary Martin Andanar.
Kinuna ni Bautista nga agarup 1,215 LGUs iti 1,528 ti nakasumitir iti kompleto a liquidation reports para iti first tranche agingga Hunio 23, 2020.
(VHS, PIA-Pang./PMCJr.-ABN)