Parang kailan lang, naka-anim na taon na pala tayo

September 3, 2017 Editorial

Parang kailan lang nang idaos ng Amianan Balita Ngayon ang kaniyang unang taong selebrasyon ng pagkakatatag.
Sa bilis ng panahon ay parang panaginip lamang na narating na pala natin ang anim na taon ng pagbibigay serbisyo sa publiko, komunidad at bayan sa larangan ng pagbabalita at pamamahagi ng mahahalagang impormasyon.
Sa loob ng anim na taong lumipas ay marami na ring nabago at nagbago. Sa mangilan-ngilang advertisers at subscribers ay yumabong na rin ito kahit paano, nadagdagan ang mga newstand at kumalat na rin ang pahayagan sa mga lalawigan at bayan ng rehiyong 1 at Cordillera. Lahat ng ito ay walang katumbas na halaga dahil inaangkin naming biyaya mula sa Panginoong Diyos at gayundin ang mainit na pagpapahalaga at pagmamalasakit ng mga kasamahan sa pagtataguyod ng pahayagang Amianan Balita Ngayon kaya umabot na tayo sa anim na taon.
Maraming dahilan upang magpasalamat.Sa anim na taong lumipas ay hindi namin maaaring kalimutan ang mga nakasama, ang ilan ay yumao na at ang ilan ay nasa ibang larangan na rin. Sa muling pag-usad sa panibagong taon ay tiyak magkakaroon ng mga bagong makakasama lalo na ang mga “interns” na labis naming ikinakatuwa dahil natatapos nila ang internship na may kabuluhan at may natututunan sa pahayagan kaya kahit paano ay nakatulong din kami sa kanila.
Sa loob ng anim na taong lumipas ay patuloy na naglilingkod kami hindi lamang sa pagbabalita kundi maging sa pagbibigay serbisyo sa komunidad na sa katunayan ay itinataguyod naming mapasaya ang mga batang mag-aaral ng mga piling mahihirap na paaralan sa pamamagitan ng “Oplan Kapote” na bahagi nito ang  feeding program at pamamahagi ng gamot, bitamina at school supplies.
Hindi natin mararating kung ano tayo ngayon kung hindi sa patuloy na suporta at paniniwala ng mga advertiser kaya nais naming iparating ang aming taos-pusong pasasalamat sa kanila – maraming salamat sa SM City Baguio, Lepanto Mines, Philex Mining Corp., Beneco, BCDA, Baguio Centermall, NGCP, Department of Agriculture, SSS, Snap Aboitiz, DOH, Suntrust, GoshenLand, ESCCorp., Leisure and Resorts World Corporation at marami pang iba pa.Maraming salamat din kina Mayor Mauricio Domogan; Mayor Martin de Guzman ng Bauang, La Union; Congressman Mark Go at Mrs. Soledad Go; Governor Cresencio Pacalso, Councilor Edgar Avila, Board Member Fernando Balaodan, Vice Mayor Joseph Marrero,  Sr. Supt. Florante Camuyot, Mr. Arnel Piil at marami pa ring iba.
Sa mga subscriber namin na kukulangin ang espasyo bagama’t di namin nabanggit ang inyong mga pangalan ay alam naming makakarating din sa inyo ang aming marubdob na pasasalamat. Sa mga tumatangkilik at nagbabasa ng ating diyaryo na linggo-linggong may laang sampung piso para dito – maraming maraming salamat po!
Hiling namin sa Diyos na siyang tunay na  pinanggalingan ng lahat ng biyaya at tagumpay na patuloy sana kaming gabayan sa pagtaguyod at pamamahala ng Amianan Balita Ngayon upang lumawig pa at magtagal kami nang sa gayon ay makapaglingkod pa at makapagbigay serbisyo sa tao at pamayanan.Muli ang aming taos-pusong pasasalamat sa inyong lahat! PMCJR.