Patrolia kontra uram iti kabanbantayan, maisaysayangkat

LAOAG CITY – Maisaysayangkat ti nainget a panagpatrolia dagiti kameng ti Barangay Ranger Officers (BRO) ken opisiales ti barangay kadagiti kabanbantayan iti Ilocos Norte tapno malapdan ti panagraira ti uram ita a kabara ti panawen.
Segun kenni Estrella “baby” Sacro, agdama nga “Environment and Natural Resources Officer” iti Ilocos Norte, naka-alerto pay dagiti BRO ken dagiti opisial ti barangay no adda mapasamak nga uram iti kabanbantayan.
Impasiguradona a saanen a maulit pay ti napasamak a dakkel nga uram iti paset ti kabanbantayan iti ili ti Dingras ken Marcos itay napan a lawas a nakadadaelan dagiti naimula a kayo iti agarup duapulo nga ektaria ti kalawana a plantasion.
Kinunana a suktan ti opisinana dagiti nauram a pinuon ti mangga iti sumarsaruno nga aldaw.
Iti agdama, ur-urayen ti lokal a gobierno ti Ilocos Norte ti panangited ti Mirae Asia Energy Corporation ti agarup P25 milion a tulong a pundo para iti pannakasalluad dagiti kabanbantayan iti probinsia.
Kinuna ni Sacro a nailatang ti nasao a pundo para iti pannakagatang ti patubo dagiti kayo a maimula iti kabanbantayan iti probinsia ken pangpasuweldo kadagiti kameng ti BRO.
Kukua ti Mirae Asia Energy Corporation ti 20 megawatt a solar farm iti Barangay Paguludan, Currimao, Ilocos Norte a pormal a narugian ti operasionna idi Pebrero 10, 2016.
Kabayatanna, madama ng isaysayangkat dagiti kameng ti Bureau of Fire Protection (BFP) ti nauneg nga imbestigasion kadagiti napasamak nga uram iti kabanbantayan iti Ilocos Norte tapno maammuan ken madusa dagiti akin-aramid. FGL,PIA-1 / ABN

Amianan Balita Ngayon