Petisyon ng market vendors laban sa lungsod, ibinasura ng korte

March 2, 2018 Latest News

LUNGSOD NG BAGUIO – Hindi kinatigan ng Regional Trial Court Branch 7 ang hiling ng isang grupo ng mga umuupa ng pwesto sa palengke upang pansamantalang pigilan ang pagpapatupad sa utos ni Mayor Mauricio Domogan na nagpapaalis sa kanila sa loteng pag-aari ng lungsod sa Kayang at Hilltop.
Sa desisyon na inilabas ni Judge Mona Lisa Tabora ng RTC Branch 7, ay hindi kailangang makitaan ng cause of action for specific performance ang lokal na pamahaalan ng Baguio dahil umpisa pa lang umano ay wala nang naipakitang kontrata ang mga complainant.
Ang grupo ng complainant na pinangungunahan ni Maria Josephine Nunez na isa sa mga tumangging mag-renew ng kanilang mga kontrata sa ilalim ng bagong lease terms na inaalok ng lokal na pamahalaan ng Baguio sa kabila ng mga naganap na negosasyon at pinalawig na deadlines.
Ayon sa korte, ang action for specific performance ay nakabase sa isang balidong kontrata ngunit ang nasabing kontrata sa pagitan ng mga sangkot na grupo ay expired na noong December 31, 2015 pa.
Ayon pa sa lokal na pamahalaan ng Baguio, bago pa mag-expire ang kontrata ay inalok na nila ang mga vendors na magrenew na ng kanilang mga kontrata, ngunit tumanggi ang mga complainant.
Hindi naman sinang-ayunan ng korte ang depensa ng mga complainant na diumano ay na-renew na ang kanilang kontrata dahil sa buwanan nilang pagbabayad ng upa sa gobyerno kahit na expired na ang kanilang mga kontrata.
Base sa Article 1687 ng Civil Code, dahil buwanang nagbabayad ang mga complainant ng upa sa palengke, ang kanilang period of lease ay magiging month to month basis matapos ang expiration ng kanilang kontrata.
Ayon sa lokal na pamahalaan ng Baguio, dahil pagmamay-ari ng siyudad sa mga loteng inuukupa ng mga complainant, mayroong karapatan ang lokal na pamahalaan na piliin ang mga obligasyong nakapaloob sa kontrata na dapat ipatupad.
Legal umano ang ginawa ng lokal na pamahalaan ng siyudad nang hindi nila i-renew ang kontrata ng mga complainant dahil tinanggihan ng mga ito na sumunod sa mga obligasyong nakapaloob sa bagong kontrata.
Sa nakaraang 47 na taon, nasa 25 centavos per square meter kada araw ang upa sa mga pwesto sa palengke at ngayon ay itinaas ito sa P75. RC BJON C. CATACUTAN, UB Intern