‘Pinas, hitik sa ‘peke’

June 25, 2017 Daplis Walang Mintis Opinion

Mariakusinang mahabagin, bumunghalit ka naman ng swerte. Bakit? Ba’y halos mga kamalasan na yata ang kinalulubluban ngayon ng ating kakarampot na isla ng Pilipinas, eh! Di na natapos-tapos ang mga ka-buwisitan.  Wagas na wagas kung bumanat eh. Ang sentro pa naman ay mga peke. Sus ginoong hubad!  Sandamakmak nga naman ang mga kapekehan sa ating bansa ngayon. Sige, bungkalin natin ang mga malas na yan pards. Pero bato- bato sa langit muna hane?

******

Simulan natin sa pangalan ng ating bansa. May nagpapanukalang dapat daw ay palitan na natin ang pangalan ng ating bansa. Na ang ibig sabyan: palitan ang katagang Pilipinas. Ng alin at anong kataga? Walang  ibinigay na suhestiyon ang nagpapanukalang mambabatas.  Hintayin daw natin. At bakit naman papalitan? Na-pepekehan daw siya dahil halaw ang salitang Pilipinas sa salitang banyaga mula Espanya. Dapat maka-Pilipino rin daw ang tunog. Dapat salitang atin talaga. Gaya ng burlis! Hoy, tumigil ka baka batuhin ka ng isang toneladang Martial Law. Sige, hintayin na lang natin kung saan hahantong ang naturang suhestiyon.

******

Kasunod ang sandamukal na nagsulputang mga peke.  Kung sa tao, may pekeng abogado; pekeng pari; pekeng doctor;  pekeng GRO, teka… meron ba? Meron daw. Yan ang mga nagkukunwari dahil sabik sa pera, hindi sa haplos.  Meron ding pekeng dentist, holdaper pala;  pekeng taga-BIR kuno gusto lang mangurakot ng datong mula sa mga hinuhuthutang negosyante;  pekeng pulis at sundalo iyon pala mga kidnaper;  pekeng masahista, salisi member pala;  at marami pang kapekehang tao.  Meron din kayang pekeng terorista? Malay natin. Di ba puwedeng maging kuno ay sibilyang residente ang isang taga-Maute para makatakas lang? Oo nga hane. At kung mga bagay na peke  sa Pilipinas, diyan tayo sikat na sikat.  Magmula sa sapatos pataas.  Grabe ang kapekehan. Kasi, marami namang bumibilib sa mga pekeng gamit dahil para daw original. Ang masaklap, baka ang pambili ay peke ring pera. Mula sigarilyo hanggang sa piyesa ng sasakyan, nakakalusot ang mga peke.  Kasi nga, mura. Pag nasira agad, makaka-pag-mura ka ng di oras.

******

Kamakailan lang, rumipeke ang mga peke. Meron daw pekeng bigas. May halong plastic daw at imported pa.Yan ang sabi nila pero wala pang ebidensiyang hawak ng mga gustong mag-imbestiga. Kaya sabi nila: walang pekeng bigas. May ganyan ng ulat noon, pero hindi rin nakalusot. Nagbalik, makakalusot kaya? Meron ding mga bumulagang pekeng news. Nagkalat sa social media. Gusto lang mapag-usapan ang gawa maski mali. Sila ang dapat palamunin ng pekeng bigas para magtanda. Joke nila: dapat yang pekeng bigas na yan ang gamitin sa unli rice. Sumunod na kontrobersiya ay ang pekeng akala o pekeng hinala hinggil sa kalusugan daw  ni Pres. Duterte. Tuloy, muling nag-machine gun ang dila ni Pres. Digong. Gusto raw ng mga kalaban niya na siya’y mamatay na para mamayagpag sila sa tuwa. Pati nga Martial Law sa Mindanao, naupakan na… ang sagot ni Digong: kung gusto nilang mapatunayan ang mga basehan sa deklarasyon ng batas-militar, sila (mga kontra) ay dapat  tumira sa Marawi.  Sabagay, ang gamit ng mga nag-giyegiyerahang grupo ay  tunay na armas at bala. Walang  pekeng bala. Higit sa lahat, hindi pekeng tao ang mga napapatay, sa hanay ng mga sundalo, pulis, residente at terorista. Tunay na giyera  ang nagaganap diyan at pinangangambahang lumala pa at mandamay ng ibang lugar.  Haayy buhay Pilipinas, kailan kaya tayo magkakaroon ng tunay at hindi pekeng katahimikan at kaginhawaan?  Abangan.  Adios mi amor, ciao, mabalos.