Presio ti pananggatang iti irik, ngimmaton

September 23, 2019 Provincial

SIUDAD TI DAGUPAN – Manipud PhP17 ket gatangennen ti National Food Authority (NFA) iti kadakilo ti irik iti PhP19, bayat nga maikkat iti add-on incentive payment iti sidong ti dati a gakat (scheme).

Iti dati a incentive scheme ket karaman iti panangbayad ti PhP3 kada kilo kas maysa nga buffer stocking incentive, PhP0.20 para iti “drying”, maysa pay a PhP0.20 para iti delivery, ken PhP0.30 cooperative development fee para kadagiti kualipikado nga umawat.

Kinuna ni Chona Maramba, assistant manager iti NFA-Western Pangasinan, nga iti daytoy a tawen ket gumatang da iti namaga ken nalinis nga irik iti nangatngato a presio nga PhP19 kada kilo, ngem iti cash incentive ket maikkaten.

“Iti suporta a presio ti irik nga PhP19, maipasigurado kadagiti maysa a nasaysayaat nga presio para kadagiti apit da,” kuna ni Maramba.

Kinuna na nga iti production cost iti irik ditoy pagilian ket kadawyan nga PhP12 kada kilo ket iti baro a presio, makagun-od dagiti mannalon iti PhP7 nu maidilig iti dati a gakat.

Mainaig iti daytoy, mabalin nga itulod dagiti mannalon iti apit da nga irik kadagiti warehouse sadiay: Alaminos GID Warehouse in Brgy. Pandayan, Alaminos City; Mangatarem GID Warehouse in Brgy. Umangan, Mangatarem; Ferrer Warehouse in Brgy. Maniboc, Lingayen; ken Unique Warehouse in Brgy. Malabago, Mangaldan.

Kabayatan na, impakaammo ti NFA nga epektibo inton Setiembre 13, 2019 iti presio ti panaglako para iti imported milled rice (25 percent broken) ken well-milled rice para kadagiti government agency/private institution ket naikeddeng nga PhP27 kada kilo manipud dati a PhP37 kada kilo a presio ti panaglako.

Impasigurado pay ni Maramba iti publiko nga amin a rice stock nga naipempen kadagiti estratehiko nga lugar dagiti bodega iti Pangasinan ket mataginayon iti kinasayaat a kondision da iti amin nga oras ken nakasagana nga mairuar para iti aniaman a emerhensia.

Innayon na nga taginayonen ti NFA-Western Pangasinan iti natalged ken umdas a buffer stock para kadagiti tattao ken maitultuloy iti suporta da kadagitimannalon baet iti patuloy a pananggatang iti apit da nga irik.

Para iti dadduma pay a saludsod iti pananggatang iti irik, dagiti interesado nga organisasyon ti mannalon wenno indibidual ket mabalin da nga makiuman iti NFA-Western Pangasinan office sadiay Lingayen iti numero a 542- 4154 ken 541-4366.

JCLR/AMB/PIA Pang/PMCJr.-ABN