Presyo ng gulay, nagbabadyang magtaas sa Baguio City

LUNGSOD NG BAGUIO – Nakatakdang magtaas ang presyo ng gulay sa pamilihang bayan ng lungsod ngayong darating na mga linggo kasabay ng pagbaba ng supply ng mga gulay galing sa iba’t ibang bahagi ng Benguet.
Ayon sa ilang vendors sa City Public Market, isang dahilan ng pagbaba ng supply ng mga gulay ay dahil sa pagbaba rin ng temperatura sa ilang bahagi ng Benguet na nagdudulot ng frost bite na sumisira sa mga pananim.
Simula noong nakaraang linggo mas bumaba ang temperatura sa iba’t ibang bahagi ng Benguet. Inaasahan ng mga vendors na sa mga darating na linggo ay mas magiging malamig pa ang panahon at maaaring magresulta sa pagbaba ng supply ng mga gulay. Ayon kay Mylene Babsa-ay, isang vegetable vendor, mahirap hulaan kung kailan bababa o tataas ang mga presyo ng gulay dahil ang mga suppliers nito kung minsan marami nila ibagsak ang mga gulay at minsan naman ay kaunti.
“Minsan kasi biglang bababa at biglang tataas naman ang presyo pero inabisuhan na ako ng supplier ko baka this week magtataas na ang prices kasi nga mas kaunti yung harvest nila and depende din kasi sa klase ng gulay kung ano yung mataas at kung ano yung mga mababa. Kadalasang mga broccoli, lettuce, at cabbage ang mga nagtataas,” aniya.
Sa inaasahang pagdagsa ng mga turista para sa Panagbenga Festival, malaki ang pag-asa ng mga vendors na mas magiging maganda rin ang bentahan ng gulay kahit na mataas o mababa ang presyo dahil isa ito sa mga nakagawian nang bilhin ng mga turistang dumarayo sa Baguio.
Magtatagal ang pagtataas ng presyo ng mga gulay hanggang matapos ang Pebrero kung kailan magsisimula na ring uminit ang klima. ALLAN LEMUEL C. SUNGA, UB Intern

Latest News

Amianan Balita Ngayon