Problema sa trapiko, disiplina ang kailangan

Base sa datos mula Land Transportation Office (LTO) Baguio City ay mahigit 57,600 na ang bilang ng mga rehistradong sasakyang de motor sa lungsod ng Baguio noong 2018 kumpara sa mahigit 44,500 noong 2017.
Kapansin-pansin ang malaking pagtaas ng bilang na pinapaniwalaan ng mga opisyal ng traffic office ng lungsod na naka-ambag sa sanhi ng bigla at lubhang pagsisikip ng trapiko at kakulangan ng paradahan sa iba’t-ibang bahagi ng lungsod.
Base sa mga pag-aaral ay nasa 10,000 hanggang 15,000 sasakyan lamang ang kakayanin ng mga kalye at daan sa lungsod upang masiguro ang maayos na daloy ng trapiko ngunit ayon sa pag-aaral ng Environmental Management Bureau (EMB-CAR) ay lumalabas na may average na mahigit 36,000 sasakyan ang nasa mga pangunahing daan sa lungsod araw-araw.
Nasa higit 2,777 naman ang maaaring paradahan sa lungsod na lubhang mababa kaysa bilang ng mga sasakyan.
Ang mga pagbuhul-buhol ng trapiko ay nagpapakita na nawala na ng Baguio ang “carrying capacity” nito na pagsilbihan ang populasyon na mas higit ng malaki na nakadisenyo para sa 25,000 residente na lumobo na sa mahigit 350,000 tao at patuloy na tumataas ang bilang dahil sa transient workers, mga estudyante at mga turista.
Maraming taon o dekada na tayong pinapahirapan ng masikip at buhul-buhol na trapiko at naging sakit ng ulo ang problemang ito sa mga naging mayor ng lungsod at maaaring patuloy na pasakitin ang ulo ng susunod na alkalde kung hindi ito matugunan ng mabuti at magkaroon ng karampatang solusyon.
Ngunit tila hindi mangyayari ito dahil nagpahayag daw ng tulong ang Metro Manila Development Authority (MMDA) na magsagawa ng pag-aaral at magbigay ng siyentipikong rekomendasyon upang makatulong sa pagresolba ng problema sa trapiko ng lungsod ng Baguio.
Ayon kay Mayor Benjie Magalong ang mga eksperto sa trapiko ng MMDA ay magmamasid at mag-iipon ng mga datos at magkaroon ng “doable recommendations” para sa agarang implementasyon upang maibsan ang sikip ng trapiko sa lungsod.
Nais din ni Mayor Magalong na magsanay ang mga opisyal ng bagong-likha na traffic and transport management division sa ilalim ng City Engineering Office (CEO) sa MMDA traffic academy upang magkaroon ng kaalaman sa pinakabagong scientific at technological interventions na aplikable sa sitwasyon ng trapiko sa lungsod.
Maliban sa tulong ng MMDA ay nangako rin daw ang Pangulong Rodrigo Duterte ng pondo para masiguro ang integrasyon at lubos na operasyon ng isang command center na tutugon sa traffic, peace keeping at disaster management. Ang command center na ito ay lokal na bersiyon ng 911 sa Davao City.
Ngayon pa lang ay bumubuhos na ang tulong mula sa pambansang gobyerno sa bagong Mayor ng lungsod.
Kaya pala kampante siya sa kaniyang pahayag na mayroong mabilis na paraan na ipapatupad ang kaniyang administrasyon para tugunan ang pagsikip ng trapiko sa lungsod.
Ang pagdami ng sasakyan at paglobo ng populasyon taon-taon ay tila hindi na mapipigilan, gayundin ang pagsikip ng trapiko dahil ang tunay na ugat ng problema ay ang sobrang dami na ng tao at sasakyan sa lungsod.
Bagama’t marami ng mga pag-aaral ang ginawa ukol sa trapiko at mga ordinansa at mga batas ang nalikha ay tila walang silbi ang mga ito sa patuloy pa ring problema.
Walang problema sa mga ekspertong tutulong at sa mga siyentipikong paraan at pagtugon sa problema sa trapiko – lahat ng ito ay mabuti.
Ngunit anong halaga ng mga ito kung wala namang tamang pagtugon ang mga tao? Gaano man kaigting ang koordinasyon ng mga kinauukulang ahensiya ng gobyerno at lokal na pamahalaan sa implementasyon ng anumang plano at proyekto kung walang disiplina ang tao at motorista ay walang patutunguhan ito.
Kailangan na talaga ng “displina” upang makamit ang nais nating lahat dahil lahat tayo ay apektado.
Kailangan na rin nating isama ang mga karatig bayan na kasali sa BLISTT dahil sila man ay umaambag sa trapiko sa lungsod, bilang sentro.
Kailangan na nating seryosohin at madaliin ang kahihinatnan ng BLISTT dahil aminin natin, sa malaon ay magiging higit ang koneksiyon ng bawat isa sa lahat ng bagay – sa pag-unlad at maging sa problema ng trapiko.
Kaya ngayon pa lang hangga’t hindi pa huli ay kailangan ng maikintal sa bawat residente ang “disiplina”- dahil sa, “sa ikauunlad ng bayan, disiplina ang kailangan”.
 
PMCJr.

Amianan Balita Ngayon