Project Bakawan, nairusuat iti Bauang

May 21, 2017 Headlines

BAUANG, LA UNION – Manamnama ti agtultuloy pay nga isasangpet dagiti nagduduma a bisita kadagiti tourist destinations iti daytoy nga ili, nga inlanad ni Mayor Eulogio Clarence Martin P. de Guzman III kas kinarukbos ti industria ti turismo iti Bauang.
Aglalo pay iti panangbukel ti Project Bakawan kas maysa nga eco-tourism mangrove park iti nasurok maysa ektaria a daga a kalkalupkupan ti nagduduma a klase ti mangrove sadiay Barangay Pudoc ken Parian Oeste.
Kiniddaw ti mayor iti municipal agriculture office, MENRO, RHU, MPDC, Tourism, Engineering, budget office, kadagiti barangay captains ti Pudoc, Parian Oeste ken presidente ti organisasyon dagiti mangngalap kas kangrunaan a mangipatungpal iti nakuna a proyekto.
Maysa nga audio visual presentation ken ti billboard dagiti mangrove farms ti maisagsaganan. No malpas dagitoy ket marugian metten ti development iti lugar.
Kooperatiba ti mangidaulo kadagiti livelihood ken dadduma pay nga aktibidad kabayatan a dagiti bumarangay ti mangtarawidwid ken mangtaripato iti proyekto.
Maysa a general assembly dagiti umili ti dua a nasao a barangay ti mabukel tapno maipakaammo ti detalye ti proyekto. Dagiti umili ti barangay ti mangaywan iti parke.
Ar-arapaapen ti mayor ti panagbalin a model community ti Puraw Kadaratan nga addaan ti good practices maipapan iti livelihood projects, kooperatiba, pannakaisaligaga dagiti bakawan, panangtaripato ken manehar ti rugrugit, ken panangaywanan tapno agtalinaed ti kinadalus ti aglawlaw.
“Bakawan is your livelihood, I want the local folks to be courteous, honest, friendly and be environment conscious. These human resources will contribute immensely to the success of this eco-tourism mangrove park,” kuna ni De Guzman.
Babaen ti 30 banka, mabalinen a marugian ti boating iti aglawlaw dagiti mangrove kas maysa kadagiti aktibidad. Naikkan ti prayoridad ti panangipatakder ti receiving ken information area, ken ti pannakatarimaan ti ECOSAN. Bauang PIO / ABN