PRTTTTTT….Bawal ti agparking dita kayongggg!

Naimbag nga oras tayo amin nga awan malabsan, Kakayong, kaarruba ken kailian..Kumusta kay metten kadagiti nadayaw a lugar yo ken nadaeg a pagtaenganyo..sapay la koma ta napia kayo a sangbayan toy kolum tayo ita a lawas…

Bayat a sursuraten tayo daytoy kolum tayo adu dagiti isyu nga intay masagsagang mismo a ditoy laeng barangay tayo…adda dagiti makapasuron, adda met dagiti makabang-ar a kunada…kasta metten kadagiti makasugkar nga isyu..ngem adda dayawen tayo la unay nga adding ti kabarbaro a local a gobierno ti siudad ti Baguio..isu daytoy panakaiserra iti trapiko wenno bikulo ti maysa a lane ti session road tunggal doming..a kayatna a sawen, nawaya dagiti umili a magna iti nasao a kalsada…saanda a pampanunoten ti pannakadungparda ken saanda unay a makalang-ab iti asuk ti tambotso ti lugan.

Maikadua nga intay raemen ket isu ti pannakadalus dagiti kangrunaan a kalsada kadagiti agmalmalem ken agpatpatnag a nakaparking..nadakamat tayo manen daytoy iti naglabas nga isyu tayo..adda maysa a paset ti city road ditoy barangay a one lane laeng ti kayariganna ta double parking metten.

Ken uray iti aldaw adda dagiti nadlaw tayo a nakaparking nga agmalmalem..sapay Apo mangiturturoon saan kadi a karaman iti towing zone ti Dominican road to diplomat ken pedro fuentes road wenno extension road? Pasensian Apo ngem agdamdamag kami laeng.

Ken adda met tay kunada nga ARO wenno na-deputize sa met dagiti tanod ken sumagmamanu a barangay officials nga agikkat iti car plate…ti saludsod, Apo mangiturturong…adda kadi napili laeng nga aldaw wenno maminsan kadi laeng iti makalawas, wenno makabulan?

Nagpipintas kuna tayo manen dagitoy nga ordinansa wenno paglintegan ngem kasanu kaseryoso dagiti mangipatungpal iti daytoy a linteg wenno ordinansa.. Adda napaliiwmi iti banda na’t Lourdes barangay..tay sigud a garahe este forever parking area ken repair shop sa pay ketdin, nadalusen kadagiti nakaparking forever..ket nagmayat a kitaen..malaksid kadagitoy a lugar, adda met nalabsen a pakdaar iti maysa a barangay a no sadino ket kunana… TOWING AREA…nagmayat ket koman no kastoy met ti aramiden dagiti dadduma a barangay…

Sumagmamanu laeng dagitoy kadagiti intay napaliiw iti naglabas nga aldaw…Adda pay maysa nga intay koma kiddawen iti local government wenno kadagiti kabarbaro a konsehal wenno dagiti elected officials tayo…kasla nga awan sa met ti proyekto tayo maipapan ir reforest tation wenno panagmula kadagiti kayo tapno in-inut a maisubli ti kinangayed ti Baguio.. sabagay kunayo seguro nga ania pay ngay ti mulaam iti kayo Mang Gusting ket nabalayan wenno napatakderan sa aminen a paset iti babbalay ken building kunayo seguro ania..ngem, adda remediona dayta…segurado saan met nga amin a solar ket nasemento..mabalin tayo met ti agmula kadagiti fruit tres wenno kayo nga agbunga…malaksid a makatuklongka iti pannakaisubli ti kinangayed ti aglawlaw babaen kadagitoy a kayo, adda pay pagburasam iti prutas inton agbungada, saan kadi?

Ala, kastan Kakayong, baliwan tayto manen ti agsasarak ta ne..adda gayam nalipatak…ur-urayen gayam ni Sofing tay Manteka, itlog ken hot dog a gatangek…narigaten ti mamalo iti binalsig..babayo….tsuptsup muahmuah…

Sirmata ken Tagtagainep ni Mang Gusting

Amianan Balita Ngayon