Region 1 nakasaganan para iti National Crime Prevention Week

September 2, 2018 Headlines

SIUDAD TI SAN FERNANDO, LA UNION – Nagduduma nga aktibidad ti naisagana iti Region I para iti pannakarambak ti 24th National Crime Prevention Week (NCPW) manipud Setiembre 3 inggana 10, 2018.
Iti napalabas a taripnong ti NCPW Regional Inter-Agency Technical Working Committee, nga imatonan ti National Police Commission (NAPOLCOM) Regional Office 1, kadwa dagiti miembro a buklen dagiti pannakabagi ti nagduduma nga line-agencies, non-government organizations, local government units, ken private sector, nailanad dagiti aktibidad iti makalawas a selebrasion.
“The NCPW is celebrated yearly to ensure public safety by upholding the campaign against crime and corruption through collective and effective approaches,” kinuna ni Regional Director Evangeline Almirante ti NAPOLCOM-1
“The celebration also aims to promote peace and order by strengthening the collaboration and cooperation among members,” innayonna.
Kas panglukat a programa iton Setiembre 3, maisayangkat ti morning mass iti Police Regional Office 1 (PRO1) chapel a masarunuan ti motorcade manipud PRO1 inggana Don Mariano Marcos Memorial State University-Mid La Union campus.
Maisayangkat inton Setiembre 4 ti forum iti Barangay Crime Prevention Committee with Community and Service-Oriented Policy (CSOP) ti Philippine National Police (PNP), NAPOLCOM, ken Philippine Drug Enforcement Agency (PDEA).
Setiembre 5 ti students forum iti La Union National High School, Bacnotan National High School, ken Don Eulogio Memorial National High School para iti Student Crime Prevention Council. Maisentro dagiti tungtungan iti drug abuse, fire prevention, CSOP, waste disposal, ken cybercrime.
Maisayangkat ti jail visitation ken gift-giving iti all-male jail inmates ti Tagudin, Ilocos Sur ken all-female inmates ti Candon City iti Setiembre 6.
“May I request all to at least donate in kind like toiletries that the inmates can possibly use inside the jail,” inyapela ni Almirante.
Maysa a mangrove-planting activity ti naikeddeng para iti Setiembre 7 iti lugar a napili ti La Union Provincial Environment and Natural Resources Office.
Iti daytoy nga aldaw, maipasdek dagiti booths ti nagduduma nga ahensia ken opisina iti CSI the City Mall ditoy siudad manipud 9am inggana 5pm tapno mangipaay iti libre a serbisio kadagiti umili. Adda pay maisayangkat a poster-making contest ken jingle-making contest iti malem.
“The competitions are expected to encourage the participation of the youth in crime prevention,” kinuna ni Almirante.
Malpas ti makalawas nga aktibidad iti Camp Brigadier General Oscar M. Florendo babaen ti maysa a programa ken awarding ti Model PNP Families inton Setiembre 10.
Ti tema ti selebrasyon tatta a tawen ket “Mamamayan, sama-samang makialam upang krimen at korapsiyon ay hadlangan.” M.P.AQUINO, PIA-La Union / ABN