Sa Taon ng Baboy, may kasaganahan kaya sa likod ng mga pagsubok?

January 11, 2019 Editorial

Ang Taon ng Baboy ay positibong taon para sa nakakarami sa 2019 ayon sa mga tanyag na Feng Shui masters. Ang 2019 daw ay napakagandang taon para gumawa ng pera at magandang taon para mamuhunan. Magiging puno raw ito ng kasiyahan, taon ng pagkakaibigan at pag-ibig, isang taon na mapalad dahil ang “Baboy” ay umaakit ng tagumpay sa lahat ng ikot ng buhay. Ang taong 2019 ay panahon ng kasaganahan subalit nagbabala ang mga Feng Shui masters na maging maingat sa mga sobra, lalo na sa sobrang paggastos.
Ang baboy ay itinuturing na isang “Traveling Star” kaya raw mas pasisiglahin ng Year of the Pig ang paglalakbay kaysa ibang mga taon, kaya tiyak na makikinabang ng husto dito ang industriya ng turismo. Gayundin, maghahatid ang taong ito ng bagong umpisa sa international relationships at bagong social order na sa ibang bansa ay maaaring magdulot ng panibagong rehimen at bagong gobyerno. Maaaring hindi malayong mangyari ito sa Pilipinas dahil sa taong ito ay sasailalim ang bansa sa mid-term elections at maghahalal ang taong bayan ng mga bagong lider sa lokal hanggang kamara at senado.
Tila hindi nalalayo ang mga pananaw ng mga eksperto dahil sa kabila ng banta ng nakaraang inflation sa Pilipinas ay nakikinita ng International Monetary Fund (IMF) ang 6.6 percent economic growth outlook sa 2019. Sa kabilang banda ay tinatayang bababa sa 4 percent ang inflation forecast sa gitna ng 6.7 percent na inflation rate noong huling mga buwan ng 2018 sanhi ng mas mahinang piso, mas mataas na excise taxes at tumataas na presyo ng langis sa buong mundo na nagpataas sa inflation.
Ipinakita naman sa Economic Update on the Philippines ng World Bank ang positibong growth direction sa larangan ng sustainability at inclusiveness sa kabila ng pagpupursige ng gobyerno na tugunan ang domestic risks sa pamamagitan ng maingat na fiscal management at napapanahong implementasyon ng tax reforms at public investment programs gaya ng “Build, Build, Build” program ng administrasyon ni Pangulong Rodrigo Duterte. Tumataas ang infrastructure spending taon-taon sa 44 sa kabuuang 75 proyekto ang naimplementa na. Dahil kilala si Duterte sa kaniyang malakas na political will at lideratong matatag ang kapasiyahan ay nais niya ang agarang implementasyon ng mga proyektong ito lalo na sa mga lugar na may potensiyal sa pamumuhunan ng negosyo.
Ang pagbaba ng kahirapan at ang tantiyang labor rate na 94.6 percent ay nakaambag sa sustainable growth trajectory ng bansa gayundin ang tumataas na populasyon na tinatantiyang aabot sa 106.6 milyon ay magiging kaakit-akit para sa foreign investment dahil sa bata, mataas na edukasyon at masisipag na mga manggagawa. Ang pagtatapos ng infrastructure development na naka-angkla sa public expenditures ay magpapalakas sa business at consumer spending. Gayunman, ang external factors ay magpapatuloy na magbibigay ng walang-katiyakang banta sa global finacial markets.
Ang World Bank 2018 report ay ipinapakita na ang average inflation ay babagsak sa 3 percent sa taong 2019 na nasa target range ng Bangko Sentral ng Pilipinas (BSP) na 2 – 4 percent. Inaasahan din na magiging pangunahing magpapasigla sa paglago ng ekonomiya ang service sector.
Subalit sa kabila ng magagandang hinaharap ng Pilipinas sa taong ito ay ang katotohanang dadaan pa tayo sa pagsubok, gaya ng banta pa rin ng mga kalaban ng estado at ng halalan sa Mayo at ito, higit sa lahat ay siyang magpapatunay na makakamit natin ang mga magagandang prediksiyon at forecast – kung magiging maayos, malinis at mapayapa ang halalan. Higit dito ay makapamili tayo ng mga mas karapat-dapat na mga kinatawan natin sa gobyerno.
PMCJr.