Saanen a mailibak

Opinion Sirmata ken Tagtagainep ni Mang Gusting

Hellooo, hellooo… naimbag nga oras kadatayo amin kakailian. Addakam manen nga umay maki-abrasa ken makinnistoria kadakayo babaen iti ABN. Naimbag nga oras kadakayo amin nga awan malibtawan. Kayat dakayo man a kumustaen kadagiti nadayaw a luglugar yo. Kadakayo a kakabsat a mannalon, kumusta dagiti raep tayo, saan met laeng a matikag? Koma, saan met a madalapus ti bagyo ania. Ta ne, Kayong Angkuan, narigat a talagan a maibaga no ania ti panniempona, addanto payen agbagyo iti bulan ti December. Ngem no maminsan, kunaek a datayo met laeng a tattao ti nakaigapuan dagitoy a panagbaliw ti panawen Kayong ta ditay ammo a sinaluadan ti kinangayed ti nakaparsuaan ta adu kadatayo ti nagbalin a gamrud. Ti laeng bukod da a bagi ti pampanunotenda. Pinagbalinda payen a Dios ti pirakda. Saandan a pinanunot ti sumarsaruno a nakaparsuaan ngem ti laeng agdama. Ket ti makadakes sada la ammo ti umawag iti Apo no isudanton ti agrigat wenno makuna a bimabadan iti pedestal nga ayan da. Ta pagarupenda a gapu ta addadan iti ngato, saanda a bumaddek iti daga.

Saanen a mailibak ti dakkel a nagbaliwan ti panawen Kayong Angkuan, mariknatayon ti epekto ti Global Warming ken Climate Change. Ngem awan latta, adu latta kadatayo ti saan a makapanunot ken mangrikna. Suweng tayo latta, sulpeng a kuna da Apong tayo. Ta ngamin, no ania dagiti makuna a maiparit, isu met ti ad-addaen tayo nga aramiden. Naglaing tayo nga agpukan iti kayo ngem ditay met ammo ti agmula, ania pay ngay…awanen ah, inton adda panag-flash flood na wenno layus adda pay panangbabalaw tayo ti Dios. A ditay maamiris a datayo met laeng ti nangdadael wenno gapuna. Ania ti gapuna a kalbuentayo ti bantay? Ania pay ti mangtengngel iti todo no dumteng ti bayakabak ta mmotayo met a ti ramut ti kayo ti mangagsep, mangtengngel iti todo ngem no awanen dagitoy, awanen a agtartarusen iti baba a pagangayanna aglayus ket tangay awan metten dagiti ramut ti kayo a mangtengngel iti daga, agregaay metten. Sus santa maria a babassit, ania ngaminen nga kinaawan panunot tayo aya. Masisirib met ti kaaduan kadatayo, ngem apay a ti la bukod a rikna ken pagayatan ti intay suroten a ditay panunoten ti madi nga epektona iti sabali ken masakbayan nangruna iti pakaseknan ti sumarsaruno a kaputotan.

Mabiit man laeng Kayong Angkuan. Adda man istoryaek kenka, maipapan daytoy iti kaanakak a balsang. Pangbugak tayo man iti kinaseryoso ti saritaantayo, narigat no daras tayo lumakay.

Gusting: Lynlyn, kaanakan, adda man damagek kenka.

Lynlyn: Ania daydiay Angkel Gusting?

Gusting: Damagko a tomboy ka kano?

Lynlyn: Sus, nagkuna met angkel… saan a pudno dayta.

Gusting: Agpayso?

Lynlyn: Wen angkel…

Gusting: Paneknekanta man ngarud. Surotenak.

Lynlyn: Wen angkel. Papananta?

Gusting: Ampang…toy ibagak ti tuladem.

Lynlyn: Wen angkel. Okey, go, go, go.

Gusting: Roses…

Lynlyn: [nalamuyot, sisasam-it] Roses…

Gusting: Good… [then] chocolates.

Lynlyn: Chocolates [nasamsam-it manen]

Gusting: Sexy…

Lynlyn: [darasna] Ayanna, Angkel Gusting? Baka makaadayo. [tomboy voice]

Ay ket, agkatawa kayo met a kayong. Ala kasta pay ta ne narigaten no maabutanak ditoy iti dalagudog ni Sofing ta dinak maurayen ket adda awitna a binalsig. Babayoooo, ‘til we meet again. Tsuptsup muahmuah.