Saplit ti nakaparsuaan

Naimbag nga oras yo amin kakaarruba, kakabagyan, kakayong ken aminen a mangtartarabay iti kolum tayo ditoy ABN, adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy  kulom tayo. Kumusta, mag-an kayo amin nga awan labasna. Nagasat nga aldaw kadakayo nga awan malabsan sukimi.

Wosshhhhhhh, dimteng ti binunyagan da a super typhoon a ni Ompong, ti maibilang a kapigsaan a bagyo a nangduprak wenno nangsaplit iti pagiliantayo iti daytoy a tawen. Bilyon a pesos ti pateg ti nadadael a sanikua kangrunaan iti benneg ti agrikultura, pagtaengan, infrastraktura ken dadduma pay malaksid iti naipatli a biag gapu iti layos, panagreggaay pannakalmes ken pannakaanud.

Iti probinsia ti Benguet, Kayong, ti maysa a kaaduan ti natay gapu iti panagreggaay. Agingga ita a masursurat daytoy kolum tayo, madama pay ti panangsapulda kadagiti maatap a nagaburan a lumugar. Adda met dagiti nag-rescue ti nairaman a natay. Adu ti nagladingit kadagiti napukawan iti kabagian wenno patpatgen iti biag. Adu ti opinion ken kapanunotan no ania a talaga ti dimmakkelan ti bilang dagiti nabiktima ken gapuna a nagreggaay. Ibaga dagiti dadduma a gapu iti awan sarday a panagminas wenno open pit mining iti nasao a lugar ngem adu met latta ti nangkontra iti daytoy nga akusasyon. Gapu iti maipagarup a panagminas ti rason a nagreggaay ti paset ti bantay, impaulog ti ahensia nga akin-sakup iti panagminas ti pannakaisardeng ti panagminas wenno open pit mining iti nasao a lugar.

Ngem no dakami ti mapagsaludsodan wenno maalaan iti kapanunotan, Kayong Angkuan, ti talaga a gapuna ket isu ti pannakakalbon dagiti kabambantayan tayo. Awanen dagiti kaykayo nga isu ti mangtengngel iti panagruka ti daga ken madagdagus a panagayos ti danum manipud iti  todo. Awanen dagiti ramramut nga isu ti mangagsep iti danum. Dagitoy ti maibilang a rason no apay a nalakan ti panagreggaay ti daga ken panag-flash flood na.

Mapan tayo iti napasamak idiay Naga City, Cebu. No labsem ti agsao, maysa a barangay ti nagaburan gapu iti landslide wenno flash flood a no sadino ket adu a babbalay ti nagaburan a kayatna a sawen, nairaman a nagaburan dagiti akim-balay. Kas makita kadagiti damag iti TV, nakalbo ti bantay iti nasao a lugar a ti rason ken gapuna addansa mapaspasamak a development. Ket dita, nakalbo met a namimpinsan ti bantay ket ti nagsagaba wenno naglak-am iti saplit ti nakaparsuaan ket dagiti nakakaasi nga inosente a lumugar.

Kaanu pay, Kayong Angkuan, a mariing tayo? Urayen tayo kadi pay a nakarkaro ti mapasaran tayo a didigra a pakakettelan ti adu biag sakbay a maamiris tayo a datayo met laeng Tao ti akin-aramid wenno akin-gapuanan. Ti awan sarday a pannakarames ti nakaparsuaan ti namagkaro met iti panagbaliw ti panawen ken ibabara ti lubong. Namin adun nga intay tinalantan ti dakes nga epekto wenno ipaay kadatayo ti panagbaliw ti panawen wenno climate change gapu iti ibabara ti lubong wenno global warming. Ngem, saan tayo nga inkaskaso. Awan sa pay addang ti gobierno tapno ma-restore wenno maisubli ti kabakiran tayo ta adda daydi naalimadamad tayo a damag a nagpamulada iti kayo ngem kalgaw. Sus anak ti tukling a balo, ania ngay dayta, adda kadi nakem dagiti nangituyang iti daytoy? Sus, agdamdamag kami laeng Kakailian tayo. Tay kunada ngarud, tay agsili isu’t magasangan wenno batu-batu sa langit, ang tamaan bukol…saan kadi Kayong Angkuan?

Anak ti tukling a balo, kasta pay kakayong ta ne, overtime tayo manen ket sal-ot, ala, aglisi ka man dita Atong…ania man ta isensenyasmon, anunsio iti hueteng… agingga ita, dayta pay laeng ti ubram. Ala, ala, kalagem ngarud tay opisyal a takrot! Kasta pay ket ne, nakaadu tayo manen. Babayoo, tsup tsup muahmuah.

Cultural show

Sirmata ken Tagtagainep ni Mang Gusting

Amianan Balita Ngayon