Sarsuela

February 25, 2017 Opinion Sirmata ken Tagtagainep ni Mang Gusting

Naimbag a kanito tayo amin kailian nga awan labasna sadino man a batug ti langit ti ayanyo. Ania ngay ti madamag, kakailian okey kadi met laeng ti kasasaad yo dita…no dakami ti kas yo kayat nga ammuen kailian, nasayaat a saan. Ania ti gapuna a saan? Sus, adu ti rason no apay kailian. Ngamin adu ti saan a nasayaat a madamag ta ne ania man ti damagen, inareston sa metten ti senado ni Senator Leila De Lima. Ania ngay dayta, pudno ngatan dayta wenno sarsuela? Tsk, tsk, isu dayta ti masya a kasuronmi nga agbuya iti damag ta kasla sarsuela. Ngem, ala, sapay la koma ta pudno a makadanunen iti korte. Koma, idi pay laeng, no adda naan-anay koma nga ebidensia, idarum a dagus ket mausig ti asinoman awan koman dayta senate inquiry wenno ania pay dita, total saan met a makaipaay iti pangngeddeng ti Senado ta saan met a korte daytoy.

Ngem, ala kailian, saan man a dagita a sarsuela a damdamag ti intay intonaren. Mapantayo ketdi idiay Baguio ta intay maki-flower festival este ay, nalpas met gayamen inton hahahaha, anian sayang ania? Nangrua iti street dancing kas kada float parade. Wen, Kayong Angkuan, no saanka pay a nakadar-ay iti daytoy a flower festival idiay siudad dagiti saleng wenno siudad ti pino, padasem inton maminsan. Ditoy a makita dagiti agkakapintas a float a naarkosan iti sabsabong kasta metten iti street dancing a pakisalisalan dagiti nagduduma a contestant manipud kadagiti nagduduma a lugar a kayatna ti makipaset iti daytoy. Maysa daytoy kadagiti kadakkelan nga aktibidad ti siudad a mapaspasamak tunggal tawen iti bulan ti Pebrero. Adu ti dumaydayo a turista, local ken gangganaet, Kayong Angkuan. Pusek dagiti hotel, transient houses gapu ta awanen ti mapagdagusanda, agaramid da payen iti tent kadagiti parke…daytoy ti maysa kadagiti kadakkelan ti mapastrek ti siudad.
Ngem, ala tangay saantayon a nasambut, Kayong baliwan tay to laengen inton umay a tawen no…sibibiag tayonto pay, a hahaha. Anian apay, saantayo la kadin a mangnamnama a sibibiag tayo pay iti dayta a panawen. Sus ka, tay kunada ngarud adda met laeng iti tao ti panagpautna no maminsan kas kuna tay gayyem ko a nutritionist ania, ibagam no ania ti ipapaunegmo ta ibagak no ania ti status ti health-mo kunana kaniak. Ket pudnonsa ta no dakami, lifestyle ti pagibasaran no ania ti status ti salun-atmo. Hay naku aya nga agpayso. No apay ketdi a no panunoten awanen ti safe a taraon ita malaksid no adda bukodmo a garden iti likudan ti balaymo wenno makuna a backyard garden. Wen Kayong Angkuan, no nagaget ka la ketdi nga agitukit iti arubayam kadagiti namnamaem a makaipaay iti bunga wenno natnateng, agbiag ka a nasalun-at ta manamnama ti kina-safety ti taraon nga inka idasar iti dulang a sagrapen met ti bukodmo a pamilia.

Ngem, sakbay a pumakada kami ita, kailian, ania gayam ti makunayo iti naipadamag a pannakatiliw ni Senador Leila De Lima gapu iti kaso a naipila kontra kenkuana? Ket no saan kami a nagbiddut gapu pay la iti droga dayta. Ngem, ala, ti makunami ania, urayen tayo ti sumaruno a mapasamak kunada ngarud antabayanan ang susunod na kabanata, hahaha. Kasla teleserye ania, Kayong Angkuan.

Bueno, Kakailian, agingga manen ditoy ti intay panagiinnistorya ta inkam man pay kumape ken Apo Editor Thom dita nay ayan pagkapkapian dagiti pada a dual citizen. Nagmayat ngamin ti agigup iti kape barako…sus, ina aya, anian a banglona. Kayong, mapantayon, agpaypayapayen ni Bro Jun. Babayooo, tsuptsup muahmuah. Adios mi Amor!