SETIEMBRE 12 NAIDEKLARA KAS SPECIAL NONWORKING HOLIDAY IDIAY ILOCOS NORTE

September 10, 2022 Headlines

SUIDAD TI LAOAG Indeklara ti Malacañang iti Setiembre 12 kas maysa a special non-working holiday idiay Ilocos Norte kas panangrambak iti maika-105 nga anibersario ti pannakaipasngay ni pimmusayen a president Ferdinand E. Marcos Sr., ama ni Presidente Ferdinand “Bongbong” Marcos Jr.

Iti maysa a surat idi Huebes, impakaammo ni Atty. Concepcion Zeny E. FerrolinoEnad, Director IV of the Malacanang Records Office, kenni Ilocos Norte Governor Matthew Joseph Manotoc nga babaen iti Proclamation 53 iti Office if the President, iti Setiembre 12, 2022 ket naideklara a maysa a special non-working holiday sadiay probinsia.

Idi Agosto 22, kiniddaw dagiti miembro ti Sangguniang Panlalawigan iti Ilocos Norte iti pannakaideklara iti Setiembre 12 a kas holiday imbes nga iti anibersario ti pannakaipasngay iti laklakay a Marcos iti Setiembre 11 nga nairana nga aldaw iti Domingo. Binigbig ti palasio iti pakasapulan a maikkan gundaway dagiti Ilocano a mangrambak iti okasion gapu ta iti Marcos Day maramrambakan a tinawen idiay probinsia adda man wenno awan iti maysa a deklarasion iti special holiday.

Imbaga ni Ilocos Norte 2nd District Representative Angelo Marcos Barba a namnamaenna nga iti “Marcos Day” bill nga inisponsoranna bayat ti umuna a terminona ket maaddaan ti maysa a kaasmangna iti Senado
iti kabiitan tapno maaprubaran a kas linteg tapno saanen nga agpasar daytoy iti narigat ken makabannog a proseso iti tinawen a panagkiddaw nga iproklama ti Malacanang a maysa a special non-woking holiday.

Kas tinawen a panangdayaw kenni “Apo Lakay”, nadumaduma a local government units karaman dagiti
sabali nga ahensia iti gobierno ken pagadlan ket nangisagana iti nagduduma nga aktibidad nga pananglagip iti impatawidna. Karaman kadagiti regular a kangrunaan iti selebasion ti Marcos Day ket iti all-veggie cooking showdown idiay Ferdinand E. Marcos Museum Complex, maysa a debate cup, ken maysa a literary ken musical competition a pakipasetan iti nadumaduma nga eskuelaan iti probinsia.

(LA-PNA Ilocos/PMCJr.-ABN)