Spring festival, magsisimula sa Pebrero 5

February 5, 2018 Metro BLISTT

Magbubukas ang Baguio Spring Festival o Chinese Lunar New Year sa isang programa sa Pebrero 5 ng umaga sa City Hall grounds.
Ang pagdiriwang ay magtatagal mula ika-5 hanggang ika-17 ng Pebrero at magsasagawa ng tradisyunal na mga aktibidad sa pangunguna ng pamahalaang lungsod sa ilalim ni Mayor Mauricio Domogan at ng Baguio Filipino-Chinese Community.
Tampok sa launching program ang Lion Dance at ang pagbibigay ng mga mensahe ni Domogan at Rep. Mark Go.
Si Spring Festival Executive committee chair Peter Ng ang magbubukas sa programa at si adviser Kane Chanbonpin ang magpapakilala sa committee members. Tatalakayin ni Lawyer Cristeta Leung ang kahalagahan ng Year of Dog.
Ilalahad din ang calendar of activities na susundan ng cultural dance presentation ng Baguio Patriotic High School Chinese Faculty at trivia na pangungunahan ni Pepito Avena, head secretariat ng committee.
Ayon sa Chinese zodiac, ngayong taon ang Year of the Earth Dog.  Ang 2018 ay ika-4715 Chinese year sa Chinese Calendar.
Kabilang sa selebrasyon ang media fellowship and briefing sa ika-7, 6:30 p.m. sa Hotel Supreme; barangay gift-sharing, ika-13 sa Gibraltar barangay; grand colorful parade sa Pebrero 17, 2:30p.m. sa Session Road kasunod ng programa sa Melvin Jones at awards night program ng 7p.m. sa Hotel Supreme. A. REFUERZO / ABN