SSS KAMATENNA DAGITI DELINKWENTE NGA EMPLOYER IDIAY LA UNION

March 8, 2025 Headlines

SAN FERNANDO CITY, LA Union

Paspasingkeden ti Social Security System (SSS) idiay La Union dagiti panagregget tapno masigurado ti panagtungpal ti employer iti Social Security Act of 2018 (Republic Act 11199), maysa a linteg a nadisenio a mangsalaknib kadagiti
trabahador a Filipino ken dagiti benepisiarioda. Bayat ti maysa a kampania a Run After Contribution Evaders (RACE) kadagiti ili ti Naguilian ken Bauang idi Mierkoles, nangipaulog ni SSS LA Union Branch Head Francisco Pentecostes kadagiti pakaammo ti panaglabsing kadagiti uppat nga employer gapu iti saanda a panangbayad
kadagiti kontribusion dagiti trabahadorda nga agdagup iti nasurok a PhP99,301.48.

Dua nga employer, bayat dayta, ti nakaawat kadagiti naisurat a pakaammo gapu iti dida pannakairehistro dagiti
negosioda iti SSS, ken maysa ti napaay a mangipaay kadagiti kasapulan a rekord. “Agarup pito nga apektado nga empleado ti sigurado a mapukawda ti proteksionda iti Social Security gapu ta napaay dagiti bukodda nga amo a mang-update kadagiti kontribusionda iti SSS. Ikkanmi dagitoy nga employer iti 15 nga aldaw tapno sarungkaranda ti SSS La Union ken risutenda dagiti delinkwensiada,” kinuna ni Pentecostes.

Suporta a magun-od para kadagiti employer nga agtungtungpal Para kadagiti employer a maipaspasango kadagiti isyu mainaig iti panagrehistro ti negosioda ken dagiti record ti panagbayad, paregtaen ida ti SSS a sumarungkar iti branch office tapno tamingenda dagiti pakaseknanda. “Dagiti Accounts Officers-tayo ket nakasagana a tumulong
kadakuada iti records reconciliation ken panagbayad kadagiti past-due contributions babaen ti contribution penalty
condonation program wenno ti installment payment plan,” innayon ni Pentecostes.

Dagiti pagbanagan ti saan a panagtungpal Namakdaar met ti Pentecostes a dagiti employer a nasarakan a nanglabsing iti Social Security Law ket mabalin a maipasango iti nakaro a dusa, agraman ti pannakaibalud manipud innem a tawen ken maysa nga aldaw agingga iti 12 a tawen, agraman dagiti multa manipud PhP5,000 agingga iti
PhP20,000. “Amin nga employer ket masapul a nainget a surotenda dagiti linteg, a pakairamanan ti naintiempuan a
pannakaipatulod dagiti kontribusion ti SSS, umno a panagrehistro ti negosio, ken kaadda ti kasapulan a dokumentasion para iti panangpaneknek kadagiti bayadan,” kinuna ni Pentecostes. Panggep ti SSS LA Union Branch ti mangisayangkat kadagiti operasion ti RACE iti binulan ken palagipan dagiti employer kadagiti ili ti Burgos, Naguilian, Bagulin, Bauang, San Juan, Bacnotan, Balaoan, Bangar, Sudipen, ken San Fernando City maipapan kadagiti obligasionda nga agtungpal.

(MRD, Pia la Union/PMCJR.- ABN)