Stock ng NFA sa Baguio City at Benguet, dumating na

LUNGSOD NG BAGUIO – Naihatid na sa rehiyon ng Cordillera ang ilang kaban ng bigas ng National Food Authority (NFA) simula noong Miyerkules (Hulyo 11) at patuloy namang nagsisidatingan ang ilan pang kaban para sa Baguio-Benguet.
Matatandaan na sa mga nakaraang buwan ay nagkaroon ng NFA rice shortage sa rehiyon at maging sa buong Pilipinas, na nagsanhi ng pagpapatigil sa mga retailers na magbenta sa nasabing bigas. Naging pasanin ito ng ibang mamimili lalo na ang mga mamamayan na salat sa buhay. Sa kabila ng pagkakaroon saganang suplay ng commercial rice ay hinahanap pa rin ng mga mamimili ang bigas ng NFA na malayong mas mura ang presyo.
Makalipas ang ilang buwang paghihintay, paunti-unti nang napupuno ang bodega ng NFA Baguio-Benguet na matatagpuan sa barangay Loakan, Baguio City.
Sa ngayon, umabot na sa 1,100 na kaban ng NFA rice ang naihatid dito at inaasahang dadating pa sa lalong madaling panahon ang mga kaban ng bigas na kukumpleto sa 102,000 kaban ng bigas na alokasyon para sa lungsod ng Baguio City at lalawigan ng Benguet.
Kaugnay nito, inumpisahan na rin ng NFA na ibahagi ang mga unang pondo ng bigas sa mga accredited retailers sa siyudad at sa iba’t ibang sangay ng gobyerno tulad ng Bureau of Jail Management and Penology (BJMP), Department of Social Welfare and Development (DSWD), at Baguio General Hospital and Medical Center (BGHMC).
Pinilahan naman ng maraming mamimili ang unang araw ng pagbubukas ng NFA rice outlet sa rice section ng Baguio City public market pero limitado lang sa limang kilo kada tao ang pinapayagang bilhin ng mga tao.
Samantala, ikinatuwa naman ng mga mamimili ang balita ukol sa pagkakaroon ng stock ng NFA rice sa merkado tulad ni Alma Picar, residente ng Barangay Lower QM. Aniya, ito’y napakagandang balita lalo na sa tulad niyang hindi kayang bumili ng maramihan na mamahaling bigas tulad ng sinandomeng at double diamond rice. Dagdag pa niya na malaking tulong ito sa bawat taong komokunsumo ng bigas sapagkat ito’y mas nakakabawas sa gastusin sa kanilang tahanan.
Ayon naman kay Melissa Custodio, tindera sa 518 accredited retailer ng NFA rice, bagaman wala pang supply ng nasabing bigas sa kanilang tindahan sa palengke ay napakaganda umanong balita ito sa kanila. Dagdag pa niya na kung sakaling darating na ang supply sa kanila ay babalik na ang dating sigla ng kanilang benta.
Sinigurado namang babantayan ng NFA ang presyo ng mga NFA rice sa merkado at iba pang mga bilihan upang maiwasan ang pang-aabuso ng ibang mga nagtitinda sa presyong itinalaga ng Rice Monitoring Committee. ROMELO DUPO III, UC INTERN

Latest News

Amianan Balita Ngayon