Strawberry, bumaba ang presyo
LA TRINIDAD, BENGUET – Mas mababa ngayong linggo ang presyo ng strawberry kumpara sa parehong panahon noong nakaraang taon.
Sa Baguio public market, nagkakahalaga ang strawberry ng P200 hanggang P350 kada kilo kumpara noong nakaraang taon na umabot sa P350 haggang P500 kada kilo.
Samantala, ang maliliit na strawberry ay nagkakahalaga ng P100 hanggang P250 kada kilo sa market ng La Trinidad. Ang mga turista ay maari ding pumitas ng strawberry diretso mula sa taniman ng mga ito sa pinakamababang halaga na P300 na dati ay umaabot sa P500 hanggang P600 sa bawat kilong strawberry na mapipitas.
Ayon sa mga market vendors sa lungsod ng Baguio, isang dahilan ng pagbaba ng presyo ng strawberry ang maraming supply mula sa La Trinidad.
Ang strawberry ay tinaguriang “one town, one product” ng La Trinidad.
Aasahan naman ang pagtaas ng presyo ng strawberry sa susunod na linggo dahil sa pagdagsa ng mga turista para sa pagdiriwang ng Strawberry Festival.
Samantala, puspusan na ang paghahanda ng lokal na pamahalaan para sa tampok na pagdiriwang ng ika-36 na Strawberry Festival sa Marso 18 at 19. Inaasahang dadaluhan ito ng libo-libong tao.
Opisyal na sinimulan ang pagdiriwang noong Pebrero 20 sa temang “Sustaining the fruits of La Trinidad’s agro-eco tourism.”
Ayon kay Valred E. Olsim, tourism officer, may kaunting pagbabago sa criteria at guidelines para sa float parade ngayong taon. Ang mga kalahok ay dapat gumamit ng non-motorized o sasakyan na walang makina para i-promote ang environmental responsibilities at maging kakaiba. Magkaibang kategorya ang environmental float na kailangang gamitan ng hindi bababa sa 80 porsyentong recycled materials at ang value of flowers float na para naman sa mga flower growing na barangays.
Isa ring inaabanagan ang 11feet by 8feet giant strawberry cake sa Marso 19. Ang mga nais makatikim ng cake ay maaaring mabili ito sa P15 kada slice. Limang panadero ang inaasahang gagawa at dedesenyo sa naturang cake. Ang strawberry cake ay tinatayang nagkakahalaga ng mahigit P500,000. Jessalyn M. Soreno, UB Intern
Gulay ng Benguet, hindi naapektuhan ng frost
February 18, 2017
LT crime rate drops
February 24, 2017